14.05.2012, 14:43 Тошак: Младите заслужуваат шанса
Македонскиот селектор го објави списокот на фудбалери со кои ќе се спротивстави на Португалија и на Ангола на крајот на месецот
Во најновите предизвици од пријателски карактер националниот фудбалски тим на Македонија ќе влезе со освежен и по малку неочекуван лик. Селекторот Џон Тошак денеска го соопшти списокот со 22 фудбалера кои ќе заиграат на контролните натпревари со Португалија на 26 мај во Леирија и против Ангола на 29 мај во Есторил. Логично и нормално е предводникот на репрезентацијата да експериментира на овие мечеви, на три месеци до почетокот на мундијалските квалификации. Неочекувано и ново е тоа што во списокот стојат имињата на шестмина играчи од репрезентацијата до 21 година, а двајца од нив прв пат се повикани ��а А-тимот.
„Сакам да ги имам предвид сите опции за да го направам најдоброто во иднина. Во моментов сметам дека е подобро да им дадам шанса на помладите. Јас како селектор на национален тим не можам да купувам играчи и да прават трансфери и затоа единствениот извор на нови фудбалери се младите репрезентации. Младите играчи одиграа со срце против Северна Ирска и затоа заслужуваат шанса“, објасни Тошак зошто ги земал предвид Спирковски, Ристовски, Хасани, Фазли и дебитантите Урдинов и Таири.
Имајќи предвид дека Лазевски е повреден, а Попов, најверојатно, нема да биде доволно закрепнат, Јани Урдинов би можел и да заигра бидејќи е единственото преостанато решение на левата бековска позиција. Таири и Спировски треба да бидат свежа крв на местото последен играч за врска и да го наметнат својот квалитет во ситуација кога стандардниот Шумуликовски нема да игра поради обврски во Тијанџин.
Првиот собир репрезентацијата ќе го има на 21 мај во Скопје, а три дена подоцна ќе отпатува за Порто. Ибраими и Демири поради клупски обврски, а Тричковски од семејни причини, ќе се приклучат на експедицијата директно во Португалија.
Голмани: Един Нурединовски (Етникос/Кипар), Мартин Богатинов (Карпати/Украина)
Одбрана: Бобан Грнчаров (Лирс/Белгија), Даниел Георгиевски (Шибеник/Хрватска), Николче Новески (Мајнц/Германија), Ванче Шиков (Волин Луцк/Украина), Даниел Мојсов (Војводина/Србија), Стефан Ристовски (Фросиноне/Италија), Владимир Димитровски (Млада Болеслав/Чешка), Јани Урдинов (Екранас/Литванија), Горан Попов (Динамо Киев/Украина)
Среден ред: Никола Глигоров (Алки/Кипар), Мухамед Демири (Тун/Швајцарија), Марио Ѓуровски (Муангтонг/Тајланд), Стефан Спировски (Борац Чачак/Србија), Фљамур Таири (Теута/Албанија)
Напад: Горан Пандев (Наполи/Италија), Иван Тричковски (АПОЕЛ/Кипар), Ферхан Хасани (Волфсбург/Германија), Самир Фазли (Херенвен/Холандија), Агим Ибраими (Марибор/Словенија), Филип Ивановски (Вардар/Македонија). (В.А.)
|
