17.05.2012, 13:21 Трговијата и инвестициите во фокусот на разговорите во Кина
Кина и Македонија се подготвени за продлабочување на соработката во областа на трговијата и инвестициите. Ова го посочи премиерот Никола Груевски во своето вчерашно обраќање на бизнис-форумот во Шангај, 22 милионски град во источна Кина, чиј економски раст за лани е 8 проценти. Тој ги повика кинеските бизнисмени да не' посетат и да се уверат во поволностите што им се нудат на компаниите. Заблагодарувајќи и' се на Стопанската комора на Шангај за организирањето на бизнис-форумот на кој присуствуваа над 150 кинески компании, Груевски го акцентира најнискиот даночен пакет во Европа и ниските трошоци за работа.
„Македонија има најнизок даночен пакет, а вкупните трошоци за реализацијата на бизнисот се многу мали. Поседуваме квалификувана и образована работна сила, која може да придонесе во резултатите на вашите компании“, истакна Груевски.
На форумот се обрати и Чен Фуронг, претседател на Стопанската комора на Шангај.
„Македонија е лоцирана во централниот дел на Балканот и отсекогаш претставувала значаен канал за трговијата, а поседува и минерални суровини. Активно ќе ги охрабруваме кинеските и шангајските компании и индивидуални бизнисмени да инвестираат. Шангај со својата развиена индустрија, трговија и услужни дејности може да и' помогне на Македонија во многу области“, потенцира Фуронг.
На форумот се обратија и вицепремиерот Владимир Пешевски, министерот за странски инвестиции Веле Самак и директорот на Агенцијата за странски инвестиции Висар Фида.
Пешевски се осврна на енергетските проекти и на можноста за искористување на рудниот потенцијал. Самак ги акцентираше проектите за развој на туристичко-угостителските зони, а ги презентираше и можностите за инвестиции во автомобилската, фармацевтската и прехранбената индустрија. Фида ги елаборираше поволностите на индустриските зони и поддршката на државата преку учество во изградбата на капацитетите и инфраструктурно инвестирање.
Владината делегација оствари и средба со менаџерскиот тим на компанијата „Хуавеј“, која се занимава со информатичко-комуникациска технологија. И двете страни се согласија во идниот период да се направи анализа за можноста за отворање на формално претставништво на „Хуавеј“ во Македонија.
|
