16.05.2012, 15:09 Пет наместо седум години затвор за Љубе Бошкоски
Скопска Апелација потврди дека Бошкоски е виновен за аферата „Кампања“, но му ја намали казната за две години
Љубиша Станковиќ
Апелацискиот суд во Скопје му ја намали затворската казна на Љубе Бошкоски од седум на пет години затвор. Ваквата одлука за лидерот на Обединети за Македонија, беше донесена уште минатата недела, но јавно беше соопштена денеска. Како што неофицијално се дознава, пресудата на повисокиот суд не предвидува повторување на судскиот процес. Бошкоски до издржувањето на казната ќе остане во затворот „Идризово“, само доколку неговите адвокати не побараат од Врховниот суд да изврши вонредно преиспитување на одлуките.
Објавувањето на денешната одлука доаѓа по еден месец од одржаната Јавна седница на која Бошкоски и адвокатите ги образложија своите жалби по пресудата со која тој, за две кривични дела, беше осуден на единствена затворска казна во траење од седум години.
Тој се најде зад решетки само еден ден по минатогодишните парламентарни избори. Беше обвинет дека како лидер на партијата извршил злоупотреба на неговата функција и дека парите кои што на ОМ им биле потребни за изборната кампања биле примени спротивно на законот.
Бошкоски беше уапсен, на шести јуни минатата година, пред ресторанот „Воденица“, а полицијата покажа хартиена кеса во која биле ставени 100.000 евра. Оттаму излегоа со тврдеше дека Бошкоски парите ги примил од познаник и дека со нив требало да се покријат трошоците на партијата за кампањата. МВР тврдеше дека пред да ги прими предметните пари Бошкоски, во уште во два наврата, примал десет, односно 20.000 евра. Всушност, токму поради ваквиот начин на финансирање полицијата и побарала дозвола за примена на посебни истражни мерки.
Неколку месеци подоцна за делата за кои што беше обвинет скопскиот кривичен суд донесе одлука со која Бошкоски беше огласен за виновен. За злоупотреба на службената положба тој беше осуден на две, а за нелегално финансирање на изборната кампања на шест, односно на единствена затворска казна во траење од седум години.
И додека судот беше со став дека Љубе Бошкоски на нелегален начин ја финансирал кампањата на ОМ, неговите бранители сметаа дека пресудата почива исклучиво на исказот на загрозениот сведок, односно човекот кој што му ги дал парите.
Од првата пресуда до оваа на Апелациониот суд во Скопје мина половина година, а за цел тој период Бошкоски повеќе пати како обвинет се појавуваше во кривичниот суд. Тој во неколку наврати јавно им се извини на сите оние кои приватно го тужеа, притоа изјавувајќи дека сето она што јавно го кажал за нив било неточно. На Бошкоски му ��ретстои уште еден судски процес во Пула каде треба да одговара за случчајот „Раштански лозја“.
|
