Сведок е министерот што го притворил Масри

Судот ќе реши дали министерот ќе биде заштитен сведок или ќе му се објави името

Досието „Калед Ел Масри“ денеска беше отворено во Судот за човекови права во Стразбур, со што Македонија стана првата земја која ќе се најде на тест околу контроверзните постапки на ЦИА во војната против тероризмот. Името на фамозниот сведок, сепак, не се дозна бидејќи на првото сослушување во Големиот судски совет се претставија само одбраната на Масри и нашиот застапник Костадин Богданов, кој ги бранеше позициите на Македонија.

Според она што можеше да се дознае, Судот најпрво ќе решава дали македонскиот министер што пропеал ќе биде заштитен сведок или неговото име ќе биде соопштено во судницата. Расправата вчера беше јавна, а на неа нашиот застапник побара случајот да биде отфрлен бидејќи е задоцнет, т.е. Масри ја поднел тужбата со задоцнување, откако истекол рокот за неа, нешто што неговиот тим го спори повикувајќи се на околностите кои тоа не му го дозволувале. Богданов, исто така, излегол со став дека во случајот „Масри“ нема повреда на правата загарантирани со европските конвенции, па затоа смета дека и од тој аспект процесот е „недопустлив“.

„Доколку судот не ја промени досегашната судска пракса во овој дел, сметаме дека имаме добра основа и шанси судот да ги прифати нашите аргументи и да ја отфрли апликацијата како недопуштена, без да има потреба да навлегува во фактите и суштината на предметот“, изјави вчера Богданов од Стразбур.

Според МИА, македонскиот владин тим побарал да биде изземена изјавата на овој сведок, за кого се наведувало само дека е висок државен функционер, без притоа да се даде неговиот идентитет. И двете страни барале заради негова заштита тој да остане анонимен.

Почетокот на судскиот процес го одбележаа сите светски медиуми, а најударно место доби во британските, кои први објавија дека има пукнатина во македонскиот став кон Ел Масри, бидејќи официјално со години од највисоки нивоа се тврдеше дека тој само влегол, кратко бил задржан заради проверка на документите и преку Косово излегол од земјата.

Експремиерот Владо Бучковски и во тоа време министер за одбрана не знаеше вчера кој би можел да биде сведокот, но посочи дека за случајот „Масри“ од надвор биле контактирани претставници на МВР и кај нив се одвивала истрагата. Масри ја тужи Македонија за нечовечко и понижувачко однесување, за повреда на правото на слобода и сигурност, за повреда на правото на приватен и семеен живот, како и на правото за правично судење и слобода на изразување, односно за прекршување на пет члена на Конвенцијата за човекови права.

„Еден од најмоќните докази во случајот е тоа што поранешен министер има обезбедено сведоштво кое е веќе во датотеката, и во суштина го потврдува тврдењето на Ел Масри. Сведокот потврдува дека Македонија го задржала Ел Масри по барање на ЦИА, дека некое време го држела притворен, а потоа овој министер им рекол на американските власти дека мора да дојдат и да го земат, зашто Македонија веќе нема да може да го држи и ќе мора да му дозволи да си оди. Тогаш ЦИА го зела авионски“, изјавил за британските медиуми еден од адвокатите на Масри, Џејмс Голдстон.

Со изјавата тој практично посочува дека фамозниот сведок бил актуелен министер во времето на настанот и тој кој практично бил инволвиран во случајот и ги носел одлуките. Германската канцеларка Ангела Меркел застана на страната на Ел Масри и обвини дека македонските власти не спровеле ефикасна истрага за овој случај и покрај тужбите од негова страна. Според тужбата објавена вчера, во неговото приведување била замешана Управата за безбедност и контраразузнавање, а девет нејзини претставници го чувале Масри деноноќно во Скопје. (С.Ј.)