Протестите ја враќаат ЛДП кај Црвенковски?

Андреј Жерновски не ја исклучи можноста за заеднички настап со СДСМ на митингот во Скопје на 2 септември

Наум Котевски


Ако се земат предвид моменталните временски варирања, не може со сигурност да очекуваме дека ќе имаме долго топло лето. Но, лидерот на најголемата опозициска партија СДСМ, Бранко Црвенковски, завчера на јавноста и' загарантира долго и динамично митингашко лето, кое треба да стартува на 3 јуни со протест во Струмица, а да финишира со „големиот општонароден“ митинг во Скопје на 2 септември. Протести, претходно, најавија и потенцијалните нови партнери на СДСМ - ЛДП, ВМРО-НП, ОМ и Достоинство.

Тоа практично претставува промена на стратегијата на СДСМ откако како што велат од најголемата опозициска партија, се исцрпиле можностите за институционална битка, но и по низата критики упатени на нејзина адреса дека таа мора да се ослободи од прангите на својата пасивност.

Покрај опозицискиот притисок врз власта, Црвенковски ќе се обиде со митинзи да му порача на ВМРО-ДПМНЕ дека, сепак, не е политички мртов.

Црвенковски за некого можеби поседува шарм како Пол Њумен, кој беше брилијантен токму во „Долго топло лето“, но прашање е колку тоа, во оваа поинаква етапа од неговата кариера, кога инаетчиски се бори со падот, а не со подемот, може да му донесе многу поени во нарушениот политички кредибилитет. Црвенковски свесен за таквата реалност, оправдано и прагматично повторно ја отвори вратата за победничката можност за создавање широка коалиција која ќе ја предводи СДСМ, по теркот на коалицијата наречена „За Македонија заедно“, формирана 2000 година, која ја собори Владата на ВМРО-ДПМНЕ со околу 600.000 гласа.

„Ќе разговараме и со другите партии. Нашата идеја за формирање широк опозициски фронт останува. Во изминатиов период се случуваше еден сосема природен процес, прво да се групираат и да остварат меѓусебна соработка партиите од своите природни кампуси. Да речеме, десничарските партии и партиите од центарот да го направат тоа. Таа фаза како што гледаме привршува и сега се отвораат можности за разговори со нас. Во наредниот период ќе бидете сведоци на такви контакти и на такви средби“, рече Црвенковски, отфрлајќи ги идеолошките разлики како можен проблем.

Тој додаде дека првин ќе види каков договор постигнале другите партии меѓу себе. „Дали ќе разговараме со сите партии одделно, или со сите одеднаш, допрва ќе видиме“, додаде Црвенковски.

ВМРО-Народна партија, ЛДП, Обединети за Македонија и Достоинство, во понеделникот, со собирот на 29 мај во „Домот на културата“ во Охрид, го најавија стартот на една од своите главни мисии - разбивање, како што велат, на стравот всаден длабоко во свеста на граѓаните. Лидерот на ЛДП, Андреј Жерновски, на фрлената ракавица од Црвенковски вели дека моментно е добро што критиките упатени кон власта доаѓаат од повеќе страни.

„Ние ги поддржуваме сите активности на која било партија, кои се насочени кон уривање на оваа власт. Очигледно е дека за суштинските проблеми, нарушените демократски процеси, економскиот застој, евроатлантските интеграции размислуваме исто со СДСМ. Тоа недвосмислено отвора можност за преговори“, вели Жерновски, кој не верува дека широкиот опозициски фронт ќе се формира до првиот митинг на СДСМ на 3 јуни.

„Разговорите ќе продолжат. Не е исклучено тие да кулминираат со заеднички настап на големиот митинг во Скопје во септември“, потенцира Жерновски.

Најавената улична демократија, дефинитивно, е обид опозицијата да се претстави во поинаква светлина од она кое, да речеме, поранешниот висок функционер на СДСМ, аналитичарот Ѓорѓи Спасов уште на крајот од минатата година го оцени со констатацијата: „Опозицијата е статистичко биро кое само ги брои жртвите на власта“.