СДСМ бара и затвор за олигарсите-кодоши

Опозиционерите го поддржуваат новиот Закон за лустрација, но бараат тој да не важи до 2006 година, туку до денес

СДСМ е подготвена да ги поддржи сите законски решенија со кои процесот на лустрација би се одвивал непречено, транспарентно и без злоупотреби. За СДСМ е прифатливо со Законот за лустрација да бидат опфатени и лицата кои стекнале капитал во претпријатија со општествена сопственост согласно со Законот за трансформација на претпријатијата со општествен капитал.

Потпретседателката на СДСМ, Ана Павловска-Данева, вчера изјави дека тоа не било доволно. „Уште пред ВМРО-ДПМНЕ и да помисли да ги спомене т.н. транзициски олигарси, во април 2010 година предложивме уставна измена со која ќе се овозможи кривичните дела поврзани со трансформацијата на општествениот и државниот капитал да не застаруваат. Еве го вистинскиот момент да изградиме консензус“, нагласи Павловска-Данева на прес-конференцијата.

Според неа, не е доволно лицата кои биле кодоши или агенти да бидат објавени на веб-страницата на Комисијата за лустрација, туку е потребно тие да подлежат на кривична одговорност и ако се докаже дека во процесот на приватизација сториле кривично дело, за тоа да одговараат согласно со законските одредби, а нелегално стекнатиот имот да го вратат.

СДСМ е против предлогот Законот за лустрација да се однесува на соработниците на службите само до 2006 година, како што предлага ВМРО-ДПМНЕ. „На тој начин се амнестираат сите соработници на службите или народски кажано кодоши кои работеле и работат за Груевски од 2006 година па досега, односно од неговото доаѓање на власт“, рече Павловска-Данева.

СДСМ смета дека со овој закон треба да бидат опфатени сите, и оние што кодошеле пред, но и оние што кодошеле по 2006 година. Опозиционерите велат дека Предлог-законот за лустрација подготвен од ВМРО-ДПМНЕ содржел огромен број правни недоречености, пропусти и недоследности и се подготвени да дискутираат, да дебатираат за да се подобри законскиот текст.

СДСМ очекува ВМРО-ДПМНЕ да отвори широка јавна расправа во која тие ќе се вклучат, а и останатите политички субјекти, институциите, како и стручната и научната јавност. (П.Р.)