Вечерва стартува четвртото издание на „Десонанз“



Фестивалот вечерва во Кинотека ќе стартува со мултимедиумската инсталација „7к: њу лајф форм“ на словенечката уметница Саша Спачал и настапот на Саше Пуцковски со својот соло-аудиовизуелен проект „Ноиту“

Уникатниот ритам на Германецот Гунар Вендел, алијас Касем Мосе, и мрачниот повеќеслоен електронски ритам на проектот „Анстам“, исто така од Германија, ќе го обележат четвртото издание на фестивалот за електронска музика и медиумска уметност „Десонанз“ што ќе се одржува од вечерва до 6 октомври годинава.

Фестивалот вечерва ќе стартува со мултимедиумската инсталација „7к: њу лајф форм“ на словенечката уметница Саша Спачал, која открива еден уникатен техно-екосистем, населен со растителни и микроскопски организми. Интерактивната инсталација ќе биде прикажана во Кинотеката на Македонија, а по неа ќе настапи Саше Пуцковски со својот соло-аудиовизуелен проект „Ноиту“.

Утревечер фестивалот ќе ги однесе посетителите на аудиовизуелното патување „Сиренс“, кое ќе се одржи во Македонскиот народен театар, на артистите Нови Сад и Ријоичи Курокава, кое, всушност, претставува реакција на економските колапси. Потоа ќе настапи македонскиот електронски артист Гоце Глигуровски, кој настапува под псевдонимот Мнемоник 45.

Во петок и сабота „Десонанз“ продолжува во клубот „Хавана“, каде што ќе обедини повеќе германски електронски музичари, како и домашни диџеи. Покрај Касем Мосе и „Анстам“, пред скопската публика ќе настапат и домашните состави „Херцел и Геновева“, „01 плант“, како и диџеите Мартчин и Хаде.

На последниот фестивалски ден во Кинотеката на Македонија ќе се одржи предавањето „Берлин - меѓу дрвени шупи и стартап-раскош“, а ќе настапи и Германецот Саша Кеш алијас диџеј Блид.

Влезот на првиот фестивалски ден е бесплатен, додека билетите за „Сиренс“ во МНТ ќе може да се купат на билетарницата на театарот по цена од 150 денари. Влезниците за музичките вечери во „Хавана“ ќе чинат 200 денари во претпродажба и 300 денари на вратата во клубот. (Н.Б.)