Инсајдер - Задоцни ли СДСМ со терминот за интерпелација?!

По речиси два месеца владина криза, опозицијата реши да иницира расправа во парламентот за доверба на кабинетот на Груевски

Лидерот на СДСМ, Бранко Црвенковски, можеби, ја изненади пошироката јавност кога, во сабота вечер во Битола, соопшти дека опозицијата ќе поднесе интерпелација за Владата, која го преживува вториот месец од кризата која избувна на 13 август во Слупчане. Но, соработници на Црвенковски тврдат дека не биле изненадени од неговиот потег. Велат дека било прашање на време и на политичка проценка кога опозицијата ќе побара одговорност од Владата за судирот меѓу коалициските партнери.

„СДСМ има стратегија на политичко дејствување и заклучивме дека сега е момент да ја разобличиме наводната криза во коалицијата, која веќе прераснува во реална криза во меѓуетничките односи“, е официјалниот став на опозициската партија, на прашањето зошто токму сега а не порано кога изби судирот во Владата се покренува иницијатива за недоверба на кабинетот на Никола Груевски.

Според неофицијални информации, пак, опозициското раководство, првично, проценило дека интерпелацијата може да резултира со хомогенизирање на ВМРО-ДПМНЕ и на ДУИ. Од тој аспект, било заклучено дека не е работа на СДСМ да придонесе за помирување на коалициските партнери, па макар и конфликтот меѓу нив да е сценарио за кревање на рејтинзите.

Наводно, било земено предвид и тоа дека нова иницијатива за недоверба на Владата не може да се покренува пред истекот на 90 дена од последното гласање доверба, што, во случајов, би значело три месеци комодитет за кабинетот на Груевски. На крајот, според некои информации, натежнале проценките дека ВМРО-ДПМНЕ и ДУИ, сепак, треба да се истераат на чистина, наместо да поентираат од конфликтот меѓу своите гласачки тела, притоа поигрувајќи си со национализам.

Во изминатите неколку седмици, социјалдемократите, главно, од дистанца ги набљудуваат случувањата во владејачката коалиција, потпирајќи се на ставот дека несогласувањата се проблем што треба да го решат оние кои и го создале, односно ВМРО-ДПМНЕ и ДУИ. Исклучок беа неколку изјави на опозициски функционери, кои предупредија на паралелизам во Министерството за одбрана или на инволвирање на ученици во политиката... Но, на прашањето дали СДСМ ќе поднесе интерпелација за министерот за одбрана Фатмир Бесими поради скандалот во Слупчане, во екот кога тој траеше, од СДСМ рекоа дека тоа треба да го стори ВМРО-ДПМНЕ. Во меѓувреме, кон крајот на август, опозицијата поднесе интерпелација за работењето на Регулаторната комисија.

Прв пат по пет години, опозицијата покренува иницијатива за колективна одговорност на Владата. Последен пат прашањето за доверба беше поставено во јуни 2007, кога партнери на „Илинденска“ беа ВМРО-ДПМНЕ, НСДП и ДПА, а на чело на СДСМ беше Радмила Шекеринска.

Политичкиот контекст, тогаш, беше многу поразличен од сегашниот: премиерот Никола Груевски, ја трошеше првата година од мандатот, а релациите меѓу ВМРО-ДПМНЕ и ДПА беа конструктивни.

Опозицискиот фронт, што го предводи СДСМ, утре се собира на „Бихаќска“, за да се договорат сите детали за барањето за недоверба и да се утврди стратегијата за настап на собраниската седница в петок. (А.М.М.)