Контрола, а не забрана за откуп на железо

Доколку забраната не се скрати, 2.500 вработени ќе станат без работа, а ќе бидат загрозени 40.000 лица од најниските социјални слоеви

Да не се забранува откупот на отпад меѓу фирмите и да се зајакнат контролите при извоз на старото железо, бараат фирмите кои се занимаваат со откуп на отпадно железо. Инспекц��јата од Министерството за животна средина, да ги прегледа сите отпади низ државата и да ги затвори оние каде што ќе се открие краден отпад. Од Асоцијацијата не се против одлуката за привремена забрана за откуп на отпадно железо од физички лица, но реагираат на временскиот период од 6 месеци што го сметаат за предолг.

„Доколку периодот не се скрати на 15 или 30 дена, во кој би бил ограничен само откупот од физички лица, а не и прометот меѓу фирмите и извозот, сите откупувачки компании ќе колабираат. Тоа ќе значи дека 2.500 вработени ќе станат технолошки вишок, а 40.000 лица од најдолните социјални слоеви кои секојдневно ги чистат депониите од отпадното железо, ќе останат без минималниот приход“, вели Владо Момировски од Асоцијацијата. Овој период, смета тој, е доволен за да бидат предложени конкретни мерки, како во иднина да се организира откупот на отпадно железо.

Министерот за животна средина и просторно планирање Абдилаќим Адеми смета дека треба да остане на сила забраната и оти обидите со разни измени и дополнувања на Законот да воведе систем за пријавување и за намалување на кражбите на железо, пропаднале бидејќи не наишле на соработка со операторите и морало да воведат забрана.

Во Асоцијацијата сметаат дека железото што останува во технолошкиот процес во компаниите не ги содржи спорните парчиња отпад како делови од железничките пруги или капаците од уличните шахти. За нив е беспредметно да се стопираат производните процеси во голем број компании кои користат токму отпадно железо и да се направи штета многу поголема отколку вредноста на старото железо откупено од физички лица. „Во мојата компанија само 20 отсто е отпад откупен од физички лица, а 80 отсто отпад од технолошки процес, кој од една оди во друга фабрика, а кај нас само се селектира и се прераспределува. Во него нема делови од отпад кои и со закон се забранети да се препродаваат, предмети од општо добро или со чија кражба се загрозува безбедноста на луѓето“, вели Момировски. Тој во името на сите членки на Асоцијацијата ги повика инспекторите да ги посетат сите 200 активни отпади низ државата и да направат детални контроли. Потенцира дека при откупот се води детална евиденција за продавачот и отпадот, а сите отпади се покриени и со видеонадзор. Момировски вели дека доколку извозот биде забранет во следните 6 месеци, штетата ќе достигне и до 10 милиони евра. Поради тоа предлага строги контроли на извозниот материјал, а потврдата од надлежните инспектори да биде задолжителен документ при излезот на отпадното железо од државата. (С.Н.)