Папуљас: Кој е Шојбле да ја навредува Грција

Грчкиот претседател не можe да прифати да ја навредуваат неговата земја

БРИСЕЛ – Грција стравува дека ќе биде исфрлена од еврозоната откако министрите од земјите-членки на зоната ја одложија одлуката за вториот пакет за спас за уште пет дена. „Ние постојано се соочуваме со нови услови, во евро��оната има многумина кои повеќе не не' сакаат. Таму има некои кои си играат со оган, дома и во странство. Некои си играат со факли, а некои си играат со чкорчиња. Но, ризикот е еднакво голем“, изјави грчкиот министер за финансии Евангелос Венизелос пред новинарите во Атина во средата по тричасовна конференциска врска со неговите 16 колеги од еврозоната. Грчките политичари ветија дека нема да ги поништат намалувањата на трошоците по изборите во април и ќе најдат дополнителни 325 милиони евра за да повлечат од буџетот. Но, шефот на еврогрупата Жан Клод Јункер изјави дека „дополнителна техничка работа“ е потребна пред министрите да може да потпишат пакет за спас во вредност од 130 милијарди евра, најверојатно в понеделник.

Германија, Финска и Холандија се меѓу првите во барањето посилни гаранции дека Атина ќе ги исполни ветувањата. „Ние треба да бидеме убедени 110 отсто“, изјави еден дипломат за оваа веб-страница по конференциската врска.

Германскиот министер за финансии Волфганг Шојбле во последниве неколку денови користеше остра реторика кон Атина. Во неделата тој за „Ди велт“ изјави дека „ние нема да ставаме пари во дупка без дно“ и дека ако Грција не може да го исплати својот долг еврозоната е „подобро подготвена“ сега отколку пред две години. Во понеделникот тој за „Дер шпигел“ изјави дека Грција треба „привремено да се откаже од дел од својот суверенитет“ ако сака повеќе пари.

Германскиот европарламентарец од редовите на централната десница Елмар Брок во средата изјави дека изборите во Грција треба да бидат одложени за една година за да им се дозволи на технократите да останат на власт. Таквите изјави произведоа силни реакции во Грција. Гркинката - комесар на ЕУ, Марија Даманаки, за „Тагесшпигел“ изјави дека напорите на нејзината земја се потценети „во одредени европски метрополи“.

Германски знамиња се палат на улиците на Атина, додека некои таблоиди ја прикажаа германската канцеларка Ангела Меркел во нацистичка униформа. Во меѓувреме, претседателот Каролос Папуљас на состанокот на воените команданти оваа недела изјави: „Не можам да прифатам дека мојата земја треба да биде навредливо критикувана од Шојбле. Не можам да го прифатам ова како Грк. Кој е Шојбле да ја навредува Грција? Кои се Холанѓаните? Кои се Финците?“ (ЕУ обзервер)

Сакала да се самоубие за да не остане без работа

Поради се' поголемите резови што Грција мора да ги помине за да го намали долгот, државната службеничка Ламброуси Хариклеа најверојатно ќе ја загуби работата. Таа се одлучи на очајнички чин. Се качи на вториот кат од зградата во која е сместена организацијата пред затворање и се закани со самоубиство ако ја загуби работата во таа организација, која поради должничката криза се' повеќе пропаѓа, јавува „Дејли мејл“.

Кога слушна за заканата со самоубиство, грчкиот министер за безбедност Христос Папутсис предупреди дека луѓето се доведени до самиот раб, но и додаде дека грчката влада направила натчовечки напори за ги прифати сите резови, но луѓето едноставно повеќе не можат да издржат. Локалните медиуми информираа дека очајната жена на крајот е одведена на сигурно. Само неколку часови претходно го спасија од самоубиство и нејзиниот сопруг.