28.11.2012, 15:35 Oд СИДА заболе шестгодишно дете
Во нашата земја првиот хив случај е регистриран во 1987, а годинава иако не е завршена, се откриени рекордни 20 нови заразени
Шестгодишно дете од Источна Македонија е најновиот пациент кој е болен од СИДА. Опасната болест му е откриена пред околу две недели кога било примено на Детската клиника заради лекување на воспалување на мозокот. Специфичните симптоми ги натерало лекарите да се посомневаат и откако тестот за ХИВ инфекцијата се покажал позитивен, детето веднаш било префрлено за лекување на Инфективна клиника. Епидемиолозите велат дека 17 години во земјава немало случај на дете болно од СИДА, односно по прилепскиот случај со двете деца, ова е прво дете на која болеста му ја пренела мајката. Неговите мајка и татко не знаеле дека имаа СИДА. За болеста дознале по тестирањето кое им било извршено откако кај нивното дете била дијагностицирана инфекцијата.
На прашањето како здравствениот систем можел да пропушти детето да се зарази од мајката, кога една од главните превентивни активности на државата е насочена токму кон спречување на ХИВ инфекцијата од мајка на дете, д-р Жарко Караџовски, раководител на Одделот за заразни болести при Институтот за јавно здравје вели дека тестирањето за ХИВ не е задолжително за бремената жената, ниту пак кога се пораѓа. Друго е прашањето што оние кои имале ризичен сексуален однос имаат страв да се тестираат, иако бесплатните анонимни тестови се достапни во 14 центри ширум земјава и во четири во Скопје.
Во 1987 година беше регистриран првиот хив заразен кај нас, заедно со семејните три случаи на СИДА, а годинава, иако не е завршена веќе се откриени рекордни 20 нови заразени. Од нив најмногу заразени се од Скопје и тоа 12 лица, потоа по тројца од Куманово и од Радовиш и двајца се од Кичево. Најголемата бројка на новозаразени за последните 25 години од СИДА-та во Македонија, д-р Караџовски ја објаснува со фактот што расте бројот на лица кои доброволно се тестирале. Годинава е пкарактеристична и по тоа што нема ниту еден смртен случај, што за д-р Караџовски е успех кон кој се стреми и Светската здравствена организација, а се должи на се' подобриот третман на болните со антиретровирусна терапија, која се' повеќе им го продоложува животот на болните од СИДА. (Ј.Ј.В.)
|
