28.11.2012, 13:56 Двајца ученици повредени во Хемиско
Двајца ученици се повредени во инцидент во скопското средно училиште „Марија Кири Склодовска“. Баналната кавга меѓу учениците Македонци и Албанци можеше да има драматични последици, но, за среќа, бргу реагираа надлежните во хемиското училиште, па ситуацијата беше ставена под контрола.
Како што соопшти МВР, инцидентот се случил вчера околу 14,40 часот во школскиот двор на „Марија Кири Склодовска“ во Аеродром.
„Без повод и причина, повеќе лица - претежно ученици од истото училиште, извршиле ‘насилство‘ врз двајца ученици на 16-годишна возраст. Тие биле удирани со клоци, тупаници и со боксирачи, при што нив им се нанесени видливи повреди, а кај останатите ученици е предизвикан страв и несигурност“, велат од полицијата.
По укажаната помош, двајцата тинејџери се пуштени на домашно лекување. Полицијата утврди дека нападот е дело на шест лица од Скопје и од селото Студеничани, на возраст од 15 до 32 години, против кои ќе бидат поднесени пријави.
Директорот на училиштето, Павле Павлов вели дека не станува збор за посериозен инцидент. Ученици извикувале „УЧК, УЧК“, мавале со конзерви, дошло до мешаница.
„Реагиравме бргу, ги вративме децата во училниците, наставата продолжи најнормално. Во мешаницата, едно од децата било удрено по глава“, ја смирува ситуацијата директорот. (Г.А.)
|
