27.11.2012, 16:23 Иванов се премисли - не оди во Тирана
Претседателот Ѓорге Иванов се премисли во последен момент - нема да оди во Тирана, каде што утре ќе се одржи централната прослава по повод стогодишнината од независноста на Албанија. Иако добил покана од неговиот албански колега Бујар Нишани, Иванов решил да не се појави на манифестацијата, на која се очекува да присуствуваат политички фактори од целиот регион.
„Претседателот одлучи да не замине на централната прослава во Тирана, поради последните инциденти“, кусо соопштија денеска од кабинетот на Иванов.
По веста дека македонскиот претседател се откажал од намерата да отпатува во Албанија, опозицијата реагира дека �� невообичаена дипломатска пракса во една недела и претседателот и премиерот на една држава да имаат две одвоени посети на една земја.
„Не е јасно тоа како Иванов планирал да присуствува во Тирана, на прославата на стогодишнината на албанското знаме и албанската држава , а кога се организираше таква прослава во Скопје, тој како домаќин не оствари средба ниту со премиерот на Албанија, ниту со премиерот на Косово“, изјави Јани Макрадули, член на Извршниот одбор на СДСМ.
Минатиот викенд, во посета на Тирана беше премиерот Никола Груевски, кон чие службено возило таму беа фрлени јајце и пластично шише.
На прославата што во неделата се одржа во Скопје, по повод големиот јубилеј на Албанците, исто така, немаше претставници на македонскиот државен врв, ниту, пак, на партиите од македонскиот блок.
Затоа, пак, на манифестацијата што ќе почне во Валона (каде што прв пат било истакнато албанското знаме со двоглавиот орел), а ќе продолжи во Тирана, ќе присуствуваат речиси целото раководство на ДУИ и повеќето министри од оваа партија.
Лидерот на ДУИ, Али Ахмети, и дел од неговите соработници уште денеска претпладне отпатуваа за Албанија. Во ДУИ велат дека нема член на партиското раководство кој нема да биде присутен на прославата во Тирана. Од Владата, пак, ни потврдија дека, на покана на албанскиот премиер Сали Бериша, меѓу присутните на централната прослава по повод стогодишнината од независноста на Албанија ќе бидат вицепремиерите Муса Џафери и Теута Арифи, министрите за правда, за екологија и за локална самоуправа, Блерим Беџети, Абдулаким Адеми и Невзат Бејта, како и заменик-министерот за внатрешни работи, Џелал Бајрами. (А.М.М.)
|
