27.11.2012, 16:07 Избран инвеститор за новата општинска зграда на Центар
Предвидено е објектот да биде на три ката, со модерен изглед и стаклена фасада
Компанијата „Пера констракшн“ ќе ја гради новата зграда на Општина Центар. Фирмата била избрана за најповолен понудувач на електронското јавно наддавање со цена од 3.080 денари за квадратен метар. Министерството за транспорт и врски понуди на продажба површина од 7.528 квадрати, плац на кој сега се наоѓаат општинските бараки.
Избраната компанија ќе биде обврзана сама да инвестира во новиот административен објект, а потоа да го предаде на користење на Општина Центар. За возврат ќе ги добие просториите од објектот што се предвидени да имаат деловна и комерцијална намена.
„За ова, компанијата пред да го потпише договорот за отуѓување на градежното земјиште ќе треба да склучи договор со Општина Центар со кој ќе се утврдат правата и обврските за изградба на објектот“, објаснуваат од Министерството.
Инвеститорот ќе има обврска да го изгради објектот во согласност со проект избран од Општината. Пред извесно време таа откупи четири идејни решенија за зградата, која ќе се гради како комбинација од сите нив. Понудените решенија предвидуваат објект со модерен изглед, на три ката и стаклена фасада.
Додека трае изградбата на новиот објект, општинската администрација е планирано да користи канцеларии во катната гаража што Центар ја гради кај МРТВ. (Дс.Т.)
|
