Тројца „ничии“ спортисти во Лондон

Натпреварувачите од Холандски Антили немаат право да ја претставуваат својата земја и затоа ќе настапат како независни спортисти на Игрите во Лондон

Третпат во историјата на Олимписките игри ќе има натпреварувачи кои нема да претставуваат ниту една држава. Станува збор за атлетичарот Ли Марвин Боневасија, за џудистот Реџинал де Винд и за едриличарката Филипине ван Анхолт. Сите тројца доаѓаат од Холандски Антили, меѓутоа ќе се натпреваруваат како самостојни спортисти, под олимпиското знаме, бидејќи нивната земја беше исклучена од Меѓународниот олимписки комитет (ИОК) во 2011 година.

Оваа селекција официјално се вика Независни олимписки учесници и во неа требаше да има уште петмина претставници на Кувајт кои беа суспендирани од олимписки комитет на оваа земја. Меѓутоа, суспензиите беа повлечени во саботата, на 14 јули, така што тројцата спортисти од Холандски Антили останаа единствени во ова друштво. Најпознат спортист од овие карипски острови е Чуранди Мартина, но од минатата година се натпреварува за Холандија под чие знаме освои злато на ЕП во Хелсинки, минатиот месец, во трката на 200 метри и во штафетата 4х100 метри.

Ова не е прв пат на едни Олимписки игри да има учесници кои не претставуваат ниту една земја и се натпреваруваат под олимпиското знаме. Во 1992 година Македонија и тогашна СФР Југославија составија тим од 58 спортисти кои немаа можност да ги претставуваат своите земји и останаа независни учесници. Причината за нашите петмина натпреварувачи беше таа што Македонскиот олимписки комитет (МОК) се' уште не беше формиран, додека Србија беше под санкции од Обединетите нации (ОН) и не смееше да учествува на Игрите. Македонски репрезенти тогаш беа Елизабета Павловска (атлетика), Лазе Поповски (кајак), Кире Филиповски (пливање), Наташа Мешковска (пливање) и Зоран Шоров (борење).

Ист случај имаше и во 2000 година, во Сиднеј, кога четворица спортисти од Источен Тимор го вееја олимпиското наместо знамето на свој��та земја, но тогаш под името Индивидуални олимписки учесници. (В.А.)