Ќе се скрати времето за пат до Австралија

Македонија и Австралија потпишаа Меморандум за разбирање меѓу воздухопловните власти на двете држави, со што се отвори патот за воведување директни авионски линии. Со Меморандумот, кој го потпишаа директорот на македонската Агенција за цивилно воздухопловство Дејан Мојсоски и амбасадорката на Австралија во Белград Хелен Студерт, се создадоа можности за вклучување повеќе авиокомпании во транспортот на патници меѓу двете земји, намалување на времетраењето на патувањата и отворање претставништва за продажба на авиобилети.

„Ова поврзување е во насока на јакнење на туризмот, како и ефикасно, економично и безбедно поврзување на Македонија со својата дијаспора и поврзаност со матичната држава на нашите иселеници“, рече Мојсоски.

Според него, АЦВ презема активности за воспоставување правна основа за влез на авиопревозници на македонскиот пазар со цел што поголемо поврзување на Македонија.

„Следната недела ќе ја парафираме спогодбата за отворено небо со Сингапур, а работиме на воспоставување редовна линија со Дубаи. Со воздухопловните власти на Канада работиме на правната рамка за авиоповрзување на двете земји“, наведе Мојсовски. Тој посочи дека во тек се преговори за спогодби за воздушен транспорт на Македонија со Египет, Индија, Малта и Кина. (С.Н.)