Бројот на жртви од Сенди се искачи на 74

Состојбата во погодените од ураганот области во САД почна постепено да се нормализира

Бројот на жртви од ураганот Сенди во САД достигна 74 лица, соопштија локалните медиуми.

Новите податоци се уште се привремени. Претходно беше соопштено дека се убиени 63 лица.

Вкупниот број на жртви од ураганот е многу поголем, бидејќи Сенди пред да стигне до североисточниот дел на САД го погоди регионот на Карибите, каде загинаа 71 лице и Хаити, каде животот го загубија 54 лица.

Состојбата во погодените од ураганот области во САД почна постепено да се нормализира. Во Њујорк театрите и музеите повторно се отворени, а снабдувањето со електрична енергија е делумно обновено.

Пациентите во две болници во најголемиот град во САД, сепак беа евакуирани, бидејќи генераторите за струја во овие две здравствени установи не функционираат.

Претседателот на САД Барак Обама вчера го посети Атлантик Сити, во сојузната држава Њу Џерси, која беше меѓу најсилно погодените од ураганот Сенди.

Претседателот Обама и гувенерот на Њу Џерси Крис Кристи, со хеликоптер ги обиколија разурнатите градови по должината на атланскиот брег.

- Сакам да испратам порака дека целата земја следеше што се случува кај вас. Сите знаеме колку силно беше погоден Џерси, изјави Обама.

Обама и Кристи привремено ги закопаа воените секири. Кристи е еден од најпопуларните републикански политичари и во текот на кампањата постојано ја напаѓаше економската политика на претседателот. Сепак гувернерот високо ги оцени помошта што Њу Џерси ја добил од сојузната Влада во Вашингтон и личниот ангажман на претседателот.

- Ако некој мисли дека во овој момент ми е дојдено до тоа да си играме политика, значи дека не ме познава, изјави Кристи на прашањето дали се прават планови и Мит Ромни да го посети Њу Џерси, за да не се добие впечаток дека само едниот од претседателските кандидати е ангажиран во помошта на погодените делови на САД.

Кампањата за изборите кои се закажани за само шест дена денеска продолжува со полно темпо, иако и двајцата кандидати се претпазливи да не остават впечаток дека ја злоупотребуваат трагедијата.