Мое ќоше

Кој ми згазна на достоинството

Ерол Ризаов

Груевски и Ахмети ни раскажуваат страшни приказни

Ми се наполни душата со достоинство и гордост кога вчера ги видов 15 нововработени во униформи како ја чистат фонтаничката на раскрсницата на влезот на најурбаната населба во Македонија Аеродром. Две повозрасни жени со пластични кофи и сунѓери ја триеја фонтаната. Избројав точно девет нивни колешки и колеги, исто во униформи, изнаседнати околу фонтаната, кои гласно даваа инструкции како најефикасно се чисти и како да се соберат паричките што минувачите ги фрлаат за среќа. Други тројца, очигледно шефови, простум со мобилки јавуваа во штабот на надлежните дека подготовките во пресрет на Св. Богородица течат беспрекорно. А, една госпоѓа од униформираниот тим за спас на државата побожно се крстеше пред минијатурното грчко црквиче. Трогнат до солзи со восхит гледав на големата преродба која овозможи 4.000 луѓе преку ноќ да најдат работа и парче леб.

И таман си реков ете што ти значи храбра и добра стратегија за решавање на најгорливиот проблем, отварање нови работни места, кога вестите резервирани за боите на Македонија од најпатриотското македонско радио ме пресекоа. За малку ќе предизвикав сообраќајка. Лидерите Никола Груевски и Али Ахмети разговарале цели два и пол часа. Муабетот го завршиле помирливо пата-пата. Ахмети појаснувал дека амбициозниот министер Фатмир Бесими немал намера да ги навреди Македонците со тоа што ставил цвеќе пред споменикот на паднатите борци за човекови права и слободи во Слупчане и им оддал почест додека му салутираат офицeри во униформи на АРМ. А, Никола Груевски му ги разјаснил последиците на Ахмети што значи тоа кога партнерот во власта ти удира нож во грбот. Изгледа Ахмети разбрал колку е страшно да се поклонуваат официри во македонски униформи пред терористи кои пукале во тие униформи. Потоа двајцата лидери се договориле, по десет дена, кога Груевски ќе се врати од Америка и Канада, по најновото негово рoaд-шоу, пак да се видат и да го продолжат разговорот таму каде што застанале. До тогаш работите ќе мируваат или ќе се разгоруваат по потреба. Заедничкиот проект е заведен под шифра - Македонија гори, бабата се чешла.

Е, со ова двајцата најодговорни македонски лидери за состојбите во државата навистина ми згазнаа на достоинството и гордоста. Буквално ме понижија. Ме изеде нивниот срам. Па добро бе луѓе, навистина ли мислите дека цицаме весла и пиеме нафта. Толку ли не' есапите дека сме удрени со мокра чорапа и ништо не разбираме. Вие сте партнери или ние. Па што не седнавте да разговарате пред да го пратите чиракот да ја наполни стомната со вода. Сега кога ја скрши во парам парчиња не' плашите со страшни приказни. Па, чеда божји, под чија команда беа загинатите борци за слобода, или терористи во Слупчане. Нивниот командант очи во очи му кажува на нашиот командант дека чиракот сакал само да наполни вода. Колкави морони не' есапите сите нас кога ни кажувате дека Законот за бранителите по цели шест години овој миг ви текна да го пратите во парламент и од тоа да правите роад-шоу со душите на загинатите и повредените борци. Командант Ахмети вели тоа мора да биде Закон кој еднакво ги опфаќа сите жртви во воениот конфликт 2001 година. И има целосно право. Ако лично тој, под чија заповед загинале неговите борци, денес е херој, највлијателен Албанец во Македонија, ако тој ја дели власта, ако целосно е политички рехабилитиран и е угледен и заслужен граѓанин на Македонија кој преговара со Никола Груевски, со Бранко Црвенковски или со кој било македонски премиер и политичар, тогаш каква е оваа мизерија од лицемерие и загриженост зошто преживеаниот војник на Ахмети, сега министер за одбрана на државата, им оддавал почит на своите загинати соборци.

Очигледно во односите меѓу коалициските партнери има голема конфузија и нејаснотии кои предизвикуваат трагикомични реакции во јавноста. Од една страна, никој од македонските и албанските политички лидери не работи на создавање амбиент за соживот и уважување, толеранција, а од друга страна, двете страни се натпреваруваат за предизборни поени кој повеќе ќе ја омаловажи и навреди другата страна. Сведоци сме на десетици и десетици разни меѓуетнички тешки инциденти и националистички јавни изјави на политичките лидери кои само ги разгоруваат тензиите и омразата. Двете страни пред своето гласачко тело се претставуваат се' порадикално во одбрана на националната кауза напаѓајќи го другиот. А, потоа по изборите ја делат власта како ништо да не било. Така ќе биде се' додека стадата им кротко пасат. А, потоа кога овците ќе станат волци ќе раскажува кој ќе преживее.