Мислења

Чудна тишина

Гордан Георгиев

Ниту една партија нема ексклузивитет да ги менува улиците во Скопје без да ги праша граѓаните. Посебно не на крајот на мандатот

ОЧИ ШИРУМ ОТВОРЕНИ

Чудна тишина се надвиснала над Македонија. Во секојдневната неподнослива политичко-медиумска врева ми се чини дека е најгласна тишината. Шест месеци од формирањето на старо-новата Влада, се чувствува огромен замор и немање на концепт за работа кај владејачката коалиција. Тоа се чувствува и од нивниот дефанзивен настап во парламентот, од немањето капацитет на мнозинството да поддржи барем едно законско решение на СДСМ кое е во прилог на подобрување на економската состојба на граѓаните.

Оваа анемичност и штедрост на власта се гледа и по ставовите на премиерот за клучните прашања околу перспективите на Република Македонија. Или сите биле против нас, или сите не' мразат, или бараме калимеро правда... па се' до последниот бисер дека пет или повеќе години немало Македонија да влезе во НАТО. Браво премиере, навистина им давате надеж на македонските граѓани. И затоа да не се чудиме што одеднаш ни се појавуваат теми кои служат единствено да го дефокусираат вниманието на граѓаните од вистинските теми.

Се отвора на голема врата „нова истрага и нови докази околу падот на ’кингерот‘“, па лустрацијата ќе се проширела и надградела, па фронтален напад кон градоначалниците на СДСМ со илјадници клевети и местенки. Во меѓувреме, масовно се менуваат имињата на улиците и булеварите.

Оваа последна иницијатива за рамковна, можеби и територијална, поделба на улиците и сокачињата на Скопје е неверојатно погрешна. Повторно на мала врата, како ноќни крадци, владејачките партии си се договориле нешто. Се договориле да им ги украдат имињата на улиците на граѓаните на главниот град, да ги обезличат улиците, да ги обезличат граѓаните, да ја избришат меморијата, да создадат нова историја, нов Македонец, нов идентитет. Да се пазарат за идентитетот.

Овие иницијативи претходно започнаа во Велес и во Битола, со јасна тенденција да се избрише еден битен, можеби најбитен елемент од македонскиот национален идентитет: историското значење на НОБ. Партизаните, борците, осамостоју��ањето на македонската држава, Охридската архиепископија, кодифицирањето на македонскиот јазик. Се' во пакет да го однесе виорот со само една одлука на Советот на градот Скопје.

Тврдам дека мнозинството од граѓаните на Скопје се против промената на имињата на улиците и тоа не само поради дополнителните трошоци што ќе ги има секој од нас, туку и поради нашата емотивна поврзаност со некоја улица, булевар, сокаче, плоштад. Поради нас самите, поради нашето минато, нашата биографија, нашиот личен идентитет.

Ниту една политичка опција која добила четиригодишен мандат нема ексклузивитет на ваква иницијатива без да ги праша граѓаните. Посебно не на крајот на мандатот. Груевски секојдневно се повикува на волјата на граѓаните и референдуми. Еве му ја можноста, нека се провери и себе и волјата на граѓаните на Скопје. Затоа, градоначалникот Коце Трајановски треба или веднаш да ја повлече оваа иницијативата или Градот Скопје нека распише референдум на кој скопјани ќе имаат можност да го кажат своето мислење. Ниту една политичка опција која добила четиригодишен мандат нема ексклузивитет на ваква ин��цијатива, без да ги праша граѓаните. Посебно не на крајот на мандатот.

Ваквите неразумни апансас иницијативи дополнително покажуваат дека владејачкото мнозинство е во тотален хаос, дека ДПМНЕ веќе нема капацитет да ги затвори или контролира напластените проблеми кои самите ги отворија. Овој хаос што го произведуваат, покрај тоа што прави секојдневни краткорочни и долгорочни штети за македонските граѓани, упатува и на уште еден заклучок: дека ДПМНЕ полека, но сигурно се подготвува за во опозиција. Можеби звучи прерано или премногу чудно да се констатира вакво нешто на само седум месеци од формирањето на новата влада, но доколку се направи мала анализа на крупните стратегиски предизвици кои натежнале над сегашната Влада, логично е да се заклучи дека многу брзо владеењето ќе им стане неподносливо. Се разбира, поединци, секако, ќе го искористат овој момент да раскрчмат повеќе од парите на граѓаните. Тоа е тажната приказна на ДПМНЕ, така беше и последната година од владеењето на Љупчо Георгиевски, така ќе биде и овој пат.

Се' си мислам дека сите прозивки кон опозицијата ќе и' се вратат како бумеранг на власта. А денот, верувајте, ќе дојде кога етикетите за „безидејност“, „криминал“, „приватизација“, „предавници“, „с’скачи“ итн. ќе станат заштитен знак на сегашнава влада. Чудно како историјата на ДПМНЕ циклично се повторува.

ДУИ заслужуваат едвај еден пасус. Оваа партија покажува невидена неспособност и ситногранапџиска логика глумејќи последен вагон во расипаната локомотива на чело со Груевски. Албанската партија на власт едноставно нема ниту политика, ниту платформа, ниту една идеја како да се справи со проблемите што ги имаат граѓаните на Македонија. Оваа левичарска „социјалдемократска“ партија која речиси никогаш не била во опозиција нема понудено ниту решено ниту еден економски, социјален или политички проблем. Единствената агенда со која ги мамеа своите гласачи (НАТО/ЕУ) ќе се скрши како кристален лустер во мај оваа година, а министрите за одбрана и за евроинтеграции, секако, ќе одат курбан. Од друга страна, политиката кон Албанците, или нивната „кауза“, ја доведоа до таков апсурд да имаме ситуација во која речиси 90 отсто од етничките Албанци во Македонија имаат негативно мислење за Никола Груевски, постариот брат на Али Ахмети.

Хм, чудна некоја тишина. Ќе бидеме внимателни децата да не се „преиграат“. Знам дека и нашите пријатели однадвор се многу внимателни.

(Авторот е пратеник и потпретседател на СДСМ)

Наш став

Објавувањето колумни и мислења од надворешни автори е одраз на намерата на „Утрински весник“ да биде моќен и влијателен глас на заедницата. Но, напоменуваме дека не се согласуваме секогаш со ставовите што ги изнесуваат некои од нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на друга политичка личност или личност од која било сфера. „Утрински весник“ се оградува од таквиот речник и конотации и ги смета за непримерни во јавната комуникација.