Поглед

Клопчето „Телеком“

Сања Наумовска

Повторно сите молчат за аферата „Телеком“. По неколку прес конференции со испукани ќор-фишеци од партиските штабови на ВМРО ДПМНЕ и СДСМ пак сите заборавија на поткупот на нашите политичари. Нема новини во истрагата, изведување докази, следење трага, или пак отворање нови правци во истражувањето на случајот.

Американската администрација на почетокот на годината се обиде да ни' ги отвори очите. Излезе извештај во кој е документирана долгогодишна истрага кај нас и во САД. Се појавија конкретни имиња, податоци, факти, докази.

Но, нашите институции и понатаму грчевито се трудат што посилно да мижат. Јавното обвинителство одамна го кажа своето а тоа е дека нема(ат)докази за поткуп. А, од друга страна „Дојче телеком“ и „Маѓар телеком“ со спогодбата за плаќање огромна отштета во САД, за да не се отвори кривична постапка, пред сите нив и пред сите нас, се обидоа да си ја ишнат мувата од капата.

И покрај тоа, ништо од ова не е доволно за кај нас барем да почне да се разговара на оваа тема. Црна Гора ќе отвори парламентарна истрага. Црногорските медиуми се полни со изјави од тамошните политичари кои бараат расветлување на аферата, а како што покажаа, подготвени се да дискутираат за тоа и во парламентот.

Би дискутрале и нашите политичари, тврдат самите. Ама, нема кој да отвори расправа, нема кој да прашува, ниту пак кој да одговори на прашањата.

Молчат политичарите, молчат компаниите, молчат и институциите. Никој не ни помислува на граѓаните. Кој треба да ги заштити? Кој треба да се грижи за нивните права? Дали некој ќе ги обесштети за огромните нереални суми кои ги плаќаа за еден импулс во фиксната и мобилната телефонија? Ако продолжи молкот на институциите, ниту едно прашање нема да добие одговор.