Струмица ќе биде како Бразил и Аргентина

Гасот ќе потече во април и ќе им заштеди по 300.000 евра годишно на институциите за греење

Маја Томиќ


Струмичани ќе бидат единствените во земјава што нареднава грејна сезона ќе работат и ќе се топлат на гас. Веќе е завршена 13-километарската гасоводна мрежа и се' е подготвено за старт на таканаречената виртуелна гасификација, по примерот на Аргентина, Бразил и повеќе европски градови. Деновиве пристигна опремата од Аргентина, а привршува адаптацијата на сите објекти што ќе бидат приклучени на овој енергенс. Гасот треба да се пушти низ системот во почетокот на април, а во меѓувреме треба да се изврши експертска контрола на апаратурата од Машинскиот факултет и да се добие лиценцата од Регулаторната комисија за енергетика. Гасифицирани ќе бидат сите компании во и околу градот, што ги има повеќе од 200, како и сите јавни и локални установи, а домаќинствата ќе можат да се приклучуваат од јуни годинава. Пластениците и оранжериите во Струмичко ќе го користат гасот подоцна, в година, во втората фаза од проектот за гасификација. Досега за овој проект се потрошени 1,6 милиони евра, средства обезбедени исклучиво од буџетот на Општината.

„Тоа е целосно наш проект, откако повеќе од две години не успеавме од Министерството за финансии да добиеме позитивно мислење за кредитирање од Светска банка. Гасоводот, всушност, ќе биде виртуелен, кој се вградува во случаи кога не постои гасоводен систем во земјата. Тоа значи, ние ќе го набавуваме гасот од Петрич, Бугарија, кој е оддалечен од Струмица 54 километри. Потоа ќе го компресираме во специјални контејнери и ќе го транспортираме до градот, каде што во посебни станици ќе го декомпресираме и ќе го пуштаме низ градската гасоводна мрежа“, вели гордо градоначалникот на Струмица, Зоран Заев. Тој додава дека веќе се адаптирани приклучоците на сите фирми и институции, корисници на гасот, за што се потрошени 300.000 евра. Над 90 отсто од нив досега ја користеа нафтата како енергенс, а 5 отсто се грееја на дрва.

„Гасификацијата ќе биде голема придобивка за градот. Не само што ќе имаат бенефит локалните корисници, туку таа ќе привлече и голем број на странски инвеститори. Веќе за април е најавено отворање на 16 нови компании во новата индустриска зона, кои ќе бидат лоцирани на простор од 400.000 квадратни метри и во нив ќе се вработат 1.200 лица. Од нив шест компании се странски, меѓу кои германската „Конкорд фуд“ за сушено овошје, турската „Ксерокс“ за компјутерски материјали, „Ла Мексикана“ за преработка на кафе, фирма за производство на кроасани, па предилница и бојачница... Дополнително, има најава за уште четири странски инвестиции во друга индустриска зона во Струмица“, нагласува Заев.

Што се однесува до приклучувањето на домаќинствата, зависно од нивниот интерес, ним ќе им се донесат гасоводните цевки до објектите, куќите или зградите, а нивна ќе биде инвестицијата за приклучокот која ќе ги чини меѓу 600 и 750 евра и понатаму ќе остане во нивна сопственост. Доколку едно домаќинство реши, наместо струјата и огревното дрво, да го користи гасот како енергенс за греење и за топлење вода, како што посочува Заев, ќе може да заштеди годишно и до 500 евра. Додека оваа заштеда за фирмите изнесува околу 600 евра. А, приближно 300.000 евра ќе биде годишната заштеда за јавните и локалните институции во Струмица кои повеќе нема да ја користат нафтата за греење.

„Што е многу важно, гасот е поевтин енергенс од нафтата, чија цена постојано расте. Тоа е еколошки чисто гориво и е обновлив, природен енергенс. Голема ќе биде придобивката и за земјоделците. Производителите на зеленчук за греење на оранжериите и пластениците користат по 500 кубни метри дрва за површина од 1 хектар и треба во зима да ложат и по три пати во текот на ноќта. Со гасификација на пластениците од една страна земјоделците ќе имаат едноставен начин за топлење на производите, а истовремено ќе се намали и уништувањето на шумите“, нагласува Заев.

Корисниците ќе го плаќаат гасот со припејд-картичка. Со струмичкиот гасовод ќе управува фирмата „Струмица - гас“. Локалниот гасовиден систем е така проектиран да може да се приклучи кон гасоводната мрежа што е дамнешна замисла на повеќе влади и еден ден би требало да се изгради низ целата земја.

Инаку, Македонија троши околу 800 кубни метри гас годишно, а гасифицирани се околу 30 фирми во Скопје и во Куманово со гасоводот кој влегува на македонско-бугарската граница кај Деве Баир. Во Куманово наскоро ќе има тендер за набавка на уреди за користење на гасот и во домаќинствата, за што постои голема заинтересираност кај граѓаните.