Бранителите ги скараа Груевски и Ахмети

Вчерашниот ден драматичен за Владата: ДУИ се закани дека ќе ја напушти коалиција. Присуството на Рикер предизвика дополнителни шпекулации за политичката ситуација

Наум Котевски



ДУИ ќе ја напушти Владата доколку Законот за бранителите помине во Собранието без во него да бидат вклучени и борците на ОНА и нивните семејства, тврдат високи функционери од албанскиот партнер во власта.

Предлог-законот, кој би требало денеска да влезе во собраниска процедура, според ДУИ, го крши таканаречениот Мајски договор.

„Доколку Законот се усвои, а не поминат амандманите на ДУИ, ќе има промени во коалицијата“, се закани генералниот секретар на „интегративците“ и министер за животна средина, Абдулаким Адеми, во изјавата за порталот на албански јазик „Порталб“.

Според ДУИ, и во 2011 во текот на преговорите за формирање на Владата ВМРО-ДПМНЕ се обврзала во овој мандат да не се покренуваат прашањата околу конфликтот во 2001 година.

ОД ВМРО-ДПМНЕ, пак, на заканите на ДУИ одговорија кратко со ставот дека партијата води принципиелна политика базирана на идеолошката платформа утврдена од партијата и членството.

„Таа платформа и тие политики добиваат свој легитимитет на секои избори. Чиновите од типот полагање цвеќе на споменик во Слупчане не биле, ниту се дел од политички договор меѓу партнерите“, велат од ВМРО-ДПМНЕ.

Предлог-законот за бранителите, според наши извори, наводно е подготвуван подолго време и требало да и' послужи на ВМРО-ДПМНЕ како предизборно оружје, но последните настани со положувањето цвеќе од страна на министерот за одбрана Фатмир Бесими на споменикот на УЧК во Слупчане, го забрзале поднесувањето.

ДУИ за случајот Слупчане потенцираше дека намерата била простување и помирување, додека од ВМРО-ДПМНЕ кажаа дека тоа е само перчење пред сопствениот електорат, со цел добивање краткорочни партиско-политички поени, на сметка на меѓуетничката доверба. Премиерот Груевски, во својата жестока реторика, меѓу другото, го нарече Бесими, со кого не сакаше да се поздрави на парадата на АРМ во касарната „Илинден“, приватно лице, а официјален Вашингтон истовремено го пофали потегот на министерот како храбар и визионерски. Додека во полн ек се шпекулациите дека и на двете партии им одговара овој случаен или договорен раздор, со цел да предизвикаат предвремени парламентарни избори заедно со локалните, со силна аргументација пред сопствените гласачки тела, проструи и информацијата дека Али Ахмети и Никола Груевски се повикани во Амбасадата на САД на помирување. Таа „трилатерална“ средба, сепак, не се случи. Двајцата лидери вчера се сретнаа со помошник-заменик државниот секретар на САД и поранешен амбасадор во земјава, Филип Рикер, но одвоено. Прв Груевски, а по него и Ахмети. Барем според официјалните изјави, на средбите немало разговори за скандалот во Слупчане. Ниту Ахмети, по средбата со Рикер, не се осврна многу на случувањата во коалицијата, но кажа дека деновиве немал средба со Груевски.

Инаку, најголемата опозициска партија во македонскиот блок СДСМ завчера се изјасни дека нема да го менува ставот и дека ќе го поддржи Законот за бранителите. Извори од СДСМ, сепак, нагласуваат дека е чудно што сега се предлага Закон за бранителите, а во 2008 година беше одбиен предлогот на Достоинство, со образложение од премиерот Никола Груевски, дека тој ќе го оптовари буџетот за 300 милиони евра. Ако тогаш немаа пари, од каде ќе најдат сега, вели нашиот соговорник.

Амандмани за Законот за бранителите, кој, според ДУИ, треба да го носи името „Закон за жртвите во конфликтот 2001 година“, освен ДУИ подготвува и партијата на Руфи Османи, НДП.

И за оваа партија, предлог-законот за посебните права на припадниците на безбедносните сили на Македонија и нивните семејства, е уште една потврда за популистичката и во основа антиалбанска политика на Владата.

„Ваквиот потег на Владата не придонесува во подобрувањето на политичката атмосфера во земјава. Напротив, иницијативата за усвојување на ваков закон, 11 години по конфликтот од 2001, има за цел да ги поттикне меѓуетничките тензии, нешто што носи добивка само за власта, но не и за обичните граѓани на оваа држава. Законот, во форма и содржина, е целосно спротивен на духот на Охридскиот договор и, п��ед се', промовира нееднаквост меѓу граѓаните поделувајќи ги на ’бранители’ и ’терористи’“, велат од НДП.

За ВМРО-Народна, пак, ставањето на Законот за бранители во собраниска процедура е само уште еден показател за исплашеноста на ВМРО-ДПМНЕ дека ја губи власта.

„ДПМНЕ имаа цели шест години да им ги дадат правата и бенефициите на бранителите кои се пропишани и со сега постојниот закон. Но, наместо тоа, бранителите континуирано беа потценувани и свесно оставени на маргините на општеството. Нивните барања и предлог-закони во 2008 и 2010 година беа целосно игнорирани. Сега, кога рејтингот на ДПМНЕ вртоглаво паѓа и им се одбројуваат деновите, не бираат средства кого се' уште да излажат и изманипулираат за да дојдат до ново гласачко тело бидејќи старото гласачко тело континуирано ги напушта“, велат од Народна.