Албанија се пере од скандалот



Официјална Тирана се обиде да ја поправи штетата, излегувајќи со помирувачка изјава дека нема и никогаш немала територијални претензии кон соседите

Големоалбанската изјава на претседателот Сали Бериша, што беше дочекана како скандал во Грција и во Македонија, предизвика згрозеност и во дипломатските кругови кај нас, како порака која е спротивна на амбициите за влез во Унијата и штетна за стабилизирањето на регионот. Два дена потоа, по прославата, и официјална Тирана се обиде да ја поправи штетата, излегувајќи со помирувачка изјава, т.е. со тврдењето дека нема и никогаш немала територијални претензии кон соседите.

„Албанија и нејзиниот народ немаат територијални претензии кон сосе��ните држави“, изјави албанскиот претседател Бујар Нишани во Тирана. „Во целата наша историја, дури и во многу тешки моменти, Албанија и нејзиниот народ никогаш немале намера да присвојат територија од своите соседи“, додаде тој одговарајќи на новинарско прашање.

Во средата шефот на грчката дипломатија во последен момент го откажа присуството на одбележувањето на 100-годишнината од независноста на Албанија, откако пред полетување од аеродромот добил транскрипт на говорот на Бериша во кој повика на „национална независност на сите албански страни од грчкиот град Превеза до Прешево и од Скопје до Подгорица“.

Грчките медиуми денеска ги цитираа оценките на тамошни дипломатски извори дека изјавата предизвикала криза во албанско-грчките односи, а истото иако не беше кажано гласно, се случи и со Македонија, по откажувањето на посетата на нашиот претседател Ѓорѓи Иванов. (Н.Р.)