ЗНМ поднесе претставки до Собранието и до МВР



Спикерот Трајко Вељаноски изрази жалење за инцидентот со новинарите и најави дека ќе поведе постапка за да утврди кој е одговорен за тоа

Даниела Трпчевска

„Ако сега не се санкционираат они кои користеа сила против новинарите, постои опасност во иднина и другите да добијат сила и уште пожестоко да се осмелат да се пресметуваат со новинарската фела“. Ова е ставот на претседателот на Здружението на новинари на Македонија, Насер Селмани, кој пред неколку дена беше сведок на немилите случувања во парламентот, кога новинарите беа отстранети од галеријата каде што ги следеа превирањата околу донесувањето на буџетот за 2013 година.

Селмани и членовите на ЗНМ вчера поднесоа претставки до претседателот на Собранието, до Народниот правобранител и до МВР, со барање да се утврди кој стои зад бркањето на новинарите и оневозможувањето професионално да ги извршуваат работните задачи. Во меѓувреме новинарските здруженија, невладините организации и новинарскиот синдикат испратија писмо до Меѓународната федерација на новинари, во кое ја опишуваат ситуацијата во земјава, ги известуваат дека со инцидентите во понеделникот се прекршени Уставот и законите и меѓународните стандарди и од нив бараат поддршка за новинарите да можат непречено да работат.

„Штетата е направена, сега се на потег институциите да го спасат нивниот образ и образот на земјата пред светот“, вели Селмани.

Тој од претседателот на Собранието Трајко Вељаноски очекува да се огради од непрофесионалното однесување на собраниските служби, а од МВР бара да се открие идентитетот на тој што ја издал наредбата да се користи сила против новинарите, без никаква основа.

„Бараме да се поведе постапка за утврдување одговорност и санкционирање на сите кои беа вклучени во акцијата против новинарите. Слична постапка очекуваме и за припадниците на обезбедувањето кои покажаа насилно однесување“, изјави вчера Селмани. Тој изрази верување дека најголемиот дел од вработените во полицијата се професионалци и дека ќе го препознаат непрофесионалното однесување на нивните колеги. „Очекуваме да се дистанцираат од нив и да ги санкционираат“, вели претседателот на ЗНМ.

Претседателот на Собранието Трајко Вељаноски вчера изрази жалење што новинарите беа отстранети пред почетокот на седницата, посочувајќи дека одлуката ја донело надлежното собраниско обезбедување за да не дојде до поголем инцидент. Тој ќе побара да се поведе постапка од надлежните институции за да се утврди одговорноста за настанот.

 „Собранието секогаш било максимално транспарентно, а јас лично, како претседател секогаш се заземам за отворен и професионален однос кон новинарите. Имајќи предвид дека беше најавено оти опозицијата нема да дозволи буџетот да се донесе и беа најавени протести и инциденти, побарав од обезбедувањето да обезбеди редовен тек на седницата“, вели Вељановски. Тој додава дека, откако се случил првиот инцидент и тој како претседател на Собранието морал да биде извлечен од пленарната сала, обезбедувањето донело оцена дека галеријата мора да биде празна за да не се случи некој поголем инцидент.

„За оваа оцена, кога станува збор за присутноста на новинарите, како претседател изразувам жалење. Ќе побарам да се поведе постапка од надлежните институции да се утврди одговорноста за настанот, при што сакам уште еднаш да апелирам дека и понатаму ќе се заземам за максимална отвореност и транспарентност на Собранието“, вели Вељаноски.

Премиерот и претседателот на државата изминативе денови изразија жалење за „немилите случувања со новинарите“, но ЗНМ одлучи да ги напушти преговорите со Владата. „Апсурдно да се разговара за подобрување на состојбата на медиумите кога на терен ни се случуваат вакви настани каде што се демонстрира сила против новинарите. Сега е моментот кога треба да се рече стоп на неодговорното и незаконско однесување кон новинарите“, објаснува Селмани.