Ако треба, лекарите ќе закажат нов термин за ��трајк

Министерството за здравство го тужи Клиничкиот синдикат, рочиштето ќе се одржи денеска

Клиничкиот синдикат смета дека нема никаков правен основ за тужба од Министерството за здравство за кое денеска треба да се одржи првото судско рочиште. Судската одлука ќе се почитува, но ако не е во интерес на лекарите и штрајкот закажан на 24 не се одржи, Синдикатот ќе организира нов штрајк.

„Сите документи се доставени согласно со законските рокови. Директорите на клиниките се информирани да направат тимови за дежурства, бидејќи тоа е нивна работна обврска во време на штрајк. Потоа, доставени се и правилата за работа во услови на штрајк и ничие здравје не смее да биде загрозено. Тоа ние како лекари најдобро го знаеме“, изјави вчера претседателот на Клиничкиот синдикат, Дејан Ставриќ. Тој потврди дека завчера Синдикатот ја примил тужбата од Министерство за здравство со која Синдикатот е тужен и се бара привремена мерка од Основниот суд за одложување на штрајкот.

„Секако, ќе одиме на рочиштето што е итно закажано. Судската одлука ќе се почитува, но ако не е во интерес на барањата на лекарите, ќе се влезе повторно во процедура за организирање штрајк, со друг датум“, посочи Ставриќ.

Тој повтори дека Синдикатот има доставено писмено барање за средба за помирување и до министерот за здравство Никола Тодоров и до премиерот Никола Груевски. Како и дека е комплетно испочитувана законската процедура за стапување во штрајк и се известени сите институции во дадениот законски рок. Лекарите, според Ставриќ, сметаат дека им се суспендира уставното право на штрајк.

„Правото на штрајк е уставно загарантирано право, тоа е предвидено во Законот за работни односи и не гледаме причина синдикатот на Клинички центар да не може да организира штрајк. Му честитаме на судот што толку брзо го закажа рочиштето и задоволни сме што е брз и ефикасен“, изјави адвокатот на Синдикатот, Тодор Петровски. (М.Т.)