Груевски и Пападимос се тестираа во Брисел

Вчерашната средба беше по иницијатива на македонскиот премиер

Брисел - Премиерот Никола Груевски и неговиот грчки колега Лукас Пападимос вчера попладне имаа средба во Брисел, прва откако грчкиот премиер ја презеде функцијата и прва по последната директна средба меѓу двајцата лидера на Грција и на Македонија, одржана на 23 јуни минатата година.

Вчерашната средба беше по иницијатива на премиерот Груевски со цел да се продолжи дијалогот по подолг период на стагнација.

Груевски вчера во Брисел учествуваше на состанокот на лидерите на Европските народни партии. На маргините на Самитот на европските десничарски партии, претседателот на македонската Влада имаше билатерални средби со унгарскиот премер Виктор Орбан, со словенечкиот Јанез Јанша, шведскиот Фредрик Рајнфилд, албанскиот Сали Бериша и со летонскиот премиер Валдис Домбровскис.

Од кабинетот на премиерот Никола Груевски соопштија дека двете страни искажале посветеност за продолжување на разговорите во рамките на ОН во насока на изнаоѓање заемно прифатливо решение.

Двајцата премиери разговарале за напредокот на билатералните односи меѓу Македонија и Грција, како и за различните аспекти на соработка меѓу двете држави.

„Конкретно за спорот за името и двете страни изразија политичка волја за продолжување на преговорите во рамки на Обединетите нации“, стои во кусото соопштение, од кабинетот на Пападимос . Пападимос и Груевски на средбата истакнале дека се надеваат дека преку преговорите ќе се најде заеднички прифатливо решение за спорот. (Н.Р.)