Кривична пријава за убиство против полицаецот од Гостивар



Во Гостивар вчера попладнето околу 13 часот во близина на кејот на реката Вардар, Ј.Т. (39) од гостиварското село Вруток застрела две лица на возраст од 26 и 30 години

Секторот за внатрешни работи Тетово поднесе кривична пријава против Ј.Т. (39) од гостиварското село Вруток, поради сомнение дека сторил кривично дело „убиство“.

Во Гостивар вчера попладнето околу 13 часот во близина на кејот на реката Вардар се случи инцидент во кој животот го загубија две лица од градот на возраст од 26 и 30 години.

Според информациите од МВР, до убиството дошло по вербална расправија која настанала околу паркинг место на кое осомничениот сакал да го паркира своето приватно возило со кое претходно од училиште ја земал својата ќерка.

Со пријавата, Ј.Т. вчеравечер беше изведен пред истражен судија на Основниот суд Гостивар, кој му определи мерка притвор од 30 дена.

Пријавениот, според МВР, делото го стори вчера на улицата „Кеј Вардар“ блок 4 во Гостивар. По претходна вербална расправија со лицата И.М.(30) и Б.Ш.(26), двајцата од Гостивар, кои живееле во непосредна близина, а во врска со паркирањето на неговото возило „хундаи“, според неговиот исказ, тие и физички го нападнале. Изреволтиран поради тоа, според кажувањето на Ј.Т, од панталоните го извадил службениот пиштол „ХС 200“, калибар 9 милиметри, сопственост на МВР и исупукал околу седум куршуми кон И.М и Б.Ш и им нанесол смртни повреди.

Од МВР информираат дека повредените со возило на случаен минувач, веднаш биле пренесени во гостиварската болница, каде што била констатирана нивна смрт.

Пријавениот и осомничен за убиство Ј.Т со своето возило, во која се наоѓала и неговата малолетна ќерка, заедно со неа дошол и самиот се пријавил во полициската станица Гостивар, по што е лишен од слобода.

Набрзо е извршен увид на местото на убиството со учество на екипа од СВР Тетово, истражен судија и јавен обвинител. Пронајдени и подигнати се пет празни чаури, едно јадро од проектил, траги од крв и друго кои ќе се вештачат, како и пиштолот со рамка со осум куршуми.