Интервју - За мене гласаа и вмровци и сдсмовци

Одлуката да се оди на избори со задоцнување од 15 дена беше погубна за опозицијата, вели Стевчо Јакимовски, градоначалник на Карпош

Александра М. Митевска

Чии политички бои ќе ги браните во третиот градоначалнички мандат, што формално го добивте како кандидат на Српската напредна странка?

Искрено верувам дека овој мој пристап е широко прифатен и има голем број симпатизери и во другите општини во Македонија, не само во Карпош. Во тој пристап, приоритет се националните интереси кои обезбедуваат напредок и благосостојба на сите граѓани во државата. Со тоа се менуваат приоритетите што досега се презентираа пред граѓаните, и во прв план избиваат интересите на граѓаните, а во втор оние на политичките партии. Со ова се иницира платформа за соработка помеѓу граѓаните на индивидуално, општинско и на ниво на политички партии, како и глобално, на ниво на државата. Со тоа треба да престанат дводецениските кавги и расправии кои не се патот на просперитетот на државата.

Во новиот општински Совет, СДСМ и ВМРО-ДПМНЕ имаат по девет советнички места, така што одлучувачки за мнозинството би требало да бидат петте мандати на СНС. На која страна очекувате да натежнат гласовите на советниците од партијата што Ве кандидираше на изборите?

Советот на Општина Карпош веќе одржа конститутивна седница на која беа верификувани мандатите на советниците од трите партии кои партиципираат во него. По девет советници имаат советничките групи на СДСМ и на ВМРО-ДПМНЕ, а петмина на Српската напредна странка во Македонија. За изборот на претседавач и на телата на Советот постои законска процедура и таа ќе се почитува и во овој случај. Процесот на консултација ќе го водат советниците кои се од мојата опција, односно од СНСМ. Во тие консултации и меѓусебно запознавање верувам дека ќе се изнајде вистинското решение за претседател и за телата на Советот. Тука ќе дојдат до израз вештините и знаењата на советниците од политичките партии кои имаат по девет советниците, колку поуспешно може да ги остварат сопствените интереси, кои се надевам дека ќе бидат насочени и, пред се', во интерес на граѓаните на Карпош. Можам да тврдам дека квалитетот на избраните советници од мојата листа гарантира дека ќе имаме големо влијание врз политиката на општинскиот Совет. Конечно, јас сум градоначалник, а како ќе функционира Советот не зависи од мене, туку од членовите на Советот.


Во вториот изборен круг, Вашиот резултат се зголеми за околу 2,5 илјади гласа, за разлика од Андреј Петров, чие салдо се намали за илјада гласа. Дали тоа значи дека добивте поддршка од гласачите на ВМРО-ДПМНЕ?

Во вториот изборен круг мојата кампања беше насочена да добијам поголем број гласови од граѓаните на Карпош. Успеав во тој дел да ги зголемам гласовите од избирачи од сите политички партии, вклучително и од СДСМ и од ВМРО-ДПМНЕ, ДОМ, Партијата на слободни демократи, како и кај гласачите од албанските политички партии. Вториот изборен круг покажа дека граѓаните излегоа и ми дадоа уште поголема поддршка. Во наредниот период ќе направиме подетална анализа колку гласачи сум придобил од ВМРО-ДПМНЕ, колку од СДСМ и од другите политички партии.

Сепак, многу поиндикативно е што вториот изборен круг покажа дека Андреј Петров во Карпош освои помалку гласови и од Јани Макрадули. Односно, Петров освои 8.780 гласа или речиси двојно помалку од Макрадули, кој само во Карпош освои 14.288 гласа. Со тоа се потврди моето тврдење дека Андреј Петров има случајна политичка кариера. По ваков дебакл, политички коректно, дури и нужно, е Андреј Петров да си поднесе оставка и како секретар на партијата и како пратеник. Тој ја загубил поддршката, за која јас тврдам дека никогаш и ја немал, дури и од својата матична Општина, Карпош. Тогаш што останува за цела Македонија. Затоа треба да си поднесе оставка и во парламентот, затоа што нема никаков кредибилитет за таа функција.

Додека бевте во СДСМ, Вие, можеби, најгласно се залагавте за учество на локалните избори? Од оваа временска дистанца, би се согласиле ли дека промената на одлуката за бојкот, сепак, беше поразителна за опозицијата?

Тоа е повеќе од јасно. Моето залагање да се донесе навреме исправна одлука за учество на локалните избори беше со цел да не се случи токму ова што сега го доживеа целата опозиција. Или накратко, моите залагања беа во насока како опозицијата да победи на локалните избори. Затоа одлуката да не се оди на избори беше погрешна, а одлуката да се оди на избори со задоцнување од 15 дена беше погубна за опозицијата.

Како се случи опозицијата да доживее речиси целосен дебакл на територијата на главниот град, по толку интензивна кампања, во текот на летото и по големиот митинг на плоштадот „Македонија“?

Успехот не се постигнува со краткорочна кампања и размислувања и одлуки во политички кабинети, туку со разбирање на потребите на граѓаните и постојаната комуникација со нив, преку нудење конкретни решенија со кои тие се согласуваат и ги сметаат за важни за подобрување на нивниот живот и работење. Успехот не се постигнува само со критикување и со инаети. Суштината на политичкото дејствување е да се водат граѓаните кон остварување на нивните цели и потреби, а не да се остваруваат потребите на политичките партии и нивното потесно раководство, кое очигледно нема слух за потребите на граѓаните.

Во кампањата настапивте со многу амбициозни ветувања? Како планирате да го реализирате сето тоа во наредните четири години?

Не ми е прв пат некој да ми кажува дека давам преамбициозни ветувања. Но, сите граѓани, цела јавност, првенствено граѓаните од Карпош, се сведоци дека успевам да ги остварам дадените ветувања.

Се надевате ли на подобра соработка со централната власт, сега кога веќе не сте член на раководството на СДСМ?

Во Македонија постојат уставно воспоставени институции за чие успешно функционирање се залагаат и се определија граѓаните на Македонија. Соработката меѓу тие институции, посебно на институциите на локално и на централно ниво, е дефинирана со закони. Успешноста на соработката зависи од почитувањето на таа регулатива, а не од волјата на политичките партии. Како и за се' друго, и во оваа област успешноста на соработката зависи од квалитетот на кадрите во општинската и во централната администрација. Од интерес на секој граѓанин и на секоја политичка партија е институциите на Македонија како држава да функционираат ефикасно и да ги остваруваат националните цели и интереси. Јас и досега успешно соработував со институциите.