Милошоски: Во НАТО на достоинствен начин

Јадранската група вчера официјално беше проширена со Босна и Херцеговина и Црна Гора

Хелсинки - Босна и Херцеговина и Црна Гора вчера официјално станаа членки на Јадранската повелба. Документот го потпишаа на состанокот на земјите на Јадранската група што се одржа во Хелсинки на маргините на 16. сесија на Министерскиот совет на ОБСЕ, со кој претседаваше македонскиот министер за надворешни работи Антонио Милошоски.

Документот го потпишаа министрите за надворешни работи на сите земји од Јадранската повелба, Македонија, Албанија, Хрватска, САД, БиХ и Црна Гора, а одлуката да се поканат овие две нови земји да се придружат е донесена во септември оваа година на состанок на групата на маргините на Генералното собрание на ОН. Придружувањето на двете нови членки се случува во време кога Македонија претседава со Јадранската повелба.

Министерот за надворешни работи Антонио Милошоски, обраќајќи се на состанокот, изрази задоволство од приклучувањето на БиХ и Црна Гора во Јадранската група, како и подготвеност за поддршка на двете земји кои ги очекуваат своите НАТО-акциски планови за членство.

„На Самитот на НАТО во Букурешт, две од трите земји од Јадранската група, Хрватска и Албанија, беа поканети во НАТО и тие почнаа и успешно ги завршија преговорите за пристап. Денес овие земји се пред вратата на НАТО, очекувајќи реализација на полноправно членство на самитот на НАТО во 2009 година. Очекуваме тие земји да бидат гласот на земјите од регионот во НАТО, бидејќи работата на Балканот во делот на интеграциите се' уште не е завршена“, рече министерот Милошоски.

Според него, процесот на интегрирање во НАТО за Република Македонија и по Самитот во Букурешт нема алтернатива. „Република Македонија ги исполни критериумите за членство во Алијансата, но ќе се приклучи кога ќе и' се овозможи да го направи тоа на достоинствен начин“, рече тој. (МИА)