Дванаесет македонски студенти на 100 најдобри универзитети

Дванаесетте македонски студенти кои беа примени на некои од стоте најдобри универзитети во светот вчера во просториите на Владата свечено ги примија договорите за стипендии што им ги врачи премиерот Груевски и министерот за образование и наука, Кралев.

„Пред половина година Владата даде јавно ветување дека ќе ги поддржи финансиски оние студенти што ќе ги исполнат условите за да студираат на некој од стоте најдобри универзитет во светот според Шангајската листа. Во тој момент не знаевме колку студенти ќе успеат да се запишат, но си зедовме обврска колкав и да биде нивниот број, да најдеме начини и средства да им се помогне да го остварат својот сон“, изјави премиерот.

Според првичната замисла, овие стипендирани студенти од страна на Министерството за образование и наука по завршувањето на образованието требаше да се вратат и да ја вршат својата дејност во Македонија, но подоцна замислата беше применета. Доколку по дипломирањето успеат да се вработат во некоја од 500 светски најдобри компании според ранг-листата на Форбс, стипендираните студенти, како што сега додаде премиерот, нема да бидат обврзани да се вратат дома, барем за неколку години.

И покрај тоа, повеќето од стипендистите во одделни изјави за медиумите претходно, искажувајќи благодарност за оваа иницијатива на Владата, потенцираа дека сакаат да се вратат во својата земја и стекнатите знаења да ги пренесат тука.

Академската 2012-2013, ќе биде првата година од спроведувањето на овој проект, а според ветувањата на министерот и на премиерот, ќе се практикува и во иднина. Министерството за образование и наука годишно само за школарина ќе издвојува различни суми, од кои најниската изнесува 500 евра годишно за студирање на еден од француските универзитети, а за највисоката школарина ќе издвојува 14.000 фунти годишно за студии на Кингс колеџот во Лондон. (Д.Л.)