Иселениците не мора да вадат македонски пасош

Печалбарите ќе треба само да пополнат формулар при влез во Македонија

Горан Адамовски


Нашинците што живеат во странство и имаат тамошен пасош, нема да мораат да вадат и македонска патна исправа за време на престојот во земјава. Штом дојдат во Македонија, ќе пополнат формулар, во кој ќе наведат каде живеат, каде ќе престојуваат и слично, што ќе ги спаси од непотребно малтретирање и трошење пари. Тие што сакаат, пак, и натаму ќе можат да добијат нов биометриски пасош, а да закажат термин можат и на интернет.

Оваа новина следува по големиот број поплаки на македонските иселеници за што неодамна прв пишуваше „Утрински весник“. Според досегашната пракса, за време на својот престој тука, иселенеците беа принудени да извадат нов македонски пасош за да можат да ја напуштат земјава што предизвика огромно незадоволство кај нив. Иницијативата е на тројцата парламентарци од дијаспората, кои, како што рече министерката за внатрешни работи, Гордана Јанкулоска, најдобро ги знаеле маките на иселениците.

Како што објаснуваат надлежните, со пополнувањето формулар, иселениците автоматски се евидентираат на избирачкиот список и ќе можат да гласаат на следните парламентарни избори.

„Оваа евиденција е само за наша употреба и во никој случај не значи нивно губење право на македонско државјанство, македонски пасош или на некој од личните документи што ги имаат во земјата од која доаѓаат“, потенцира Јанкулоска.

Првата полицајка заедно со министерот за надворешни работи, Никола Попоски, и тројцата пратеници од дијаспората, Павле Саздов, Милорад Додевски и Ристо Манчев, вчера на скопскиот аеродром „Александар Велики“ на патниците што слетаа од Виена им делеа промотивен материјал за Македонија. Во нив се наведени основни податоци за нашата земја и за правилата на однесување, во смисла на пријавување престој, користење меѓународна возачка дозвола, местата што се препорачуваат за посета и слично.

„Доаѓам од Австралија и првпат ми се случува вакво нешто“, кусо ни изјави еден од патниците, кој беше збунет од „добредојдовте“ на министрите и претставниците на медиумите, кои го следеа настанот.

Додека македонската држава се обидува да им угоди на туристите, статистичкото биро на Европската унија, Еуростат, вчера ги објави најновите податоци околу бројот на патувања реализирани во 2011 година. Бројките од 1,2 милијарди патувања реализирани од државјани на земјите од ЕУ, барем во овој сектор, значат смирување на ситуацијата по периодот на криза. Од нив, повеќе од милијарда патувања биле за одмор, а остатокот е за службени посети. Најмногу патувале Германците (околу 260 милиони), Французите (225 млн.) и Британците (143 млн.) Најголемо намалување е забележано во Бугарија (-60 проценти во однос на 2008 година) и во Чешка (-51 отсто), а најголемо во Естонија (+50 проценти) и во Шведска (+25 отсто). На листата ја нема Македонија. (Г.А.)