Ќе не' смрзне ли „Топлификација“?

Граѓаните стравуваат дека тие ќе го извлечат најдебелиот крај од состојбата со парното греење

Сања Наумовска



Ќе имаат ли скопјани топли домови зимава? Ќе се скрши ли врз нивниот грб заплетканата состојба во која се наоѓа производителот на топлинска енергија „Топлификација“. Граѓаните се загрижени во кој правец ќе се развива случајот со оваа компанија, доколку до крајот на неделава на јавниот повик на Регулаторната комисија за енергетика не се јави ниту една друга заинтересирана фирма да ги земе под закуп фирмите-ќерки и да продолжи со снабдувањето со топлинска енергија.

Експерти објаснуваат дека во тој случај „Топлификација“ ќе мора да продолжи да ги снабдува скопјани со топлинска енергија. Сепак, се поставува прашањето под кои услови, дали и понатаму ќе инсистира ли на зголемување на цената на парното или, пак, ќе бара нови кредити и ќе се задолжува кај државни фирми како случајот со ЕЛЕМ и МЕПСО? Граѓаните загрижено се прашуваат кој ќе гарантира дека парното нема да секне ако „Топлификација“ нема пари?

„Граѓаните плаќаат редовно, за една неплатена сметка се закануваат со извршител, а објавуваат дека се во загуба. Згора на се' се закануваат дека нема да можат да греат цела зима, бидејќи немаат доволно пари и бараат зголемување на цените. Од друга страна, не можат да се задолжуваат без граници кај банките, а во тој случај ќе настрадаме ние, граѓаните“, коментираат скопјани.

Експерти, пак, се децидни, зголемување на цените на парното греење не треба да има. Едноставно е невозможно да се доближат сумите за колективно и за индивидуално затоплување, коментираат тие. Тоа нема никаква економска логика, додаваат, објаснувајќи дека пресметките покажуваат оти граѓаните кои го напуштиле системот на „Топлификација“ и одлучиле да се греат на струја или, пак, на дрва не плаќаат драстично повисоки суми. Според мерењата направени во еден стан во Кисела Вода, од осумдесетина квадрати сметката за парно која се плаќа 12 месеци во годината е над 3.000 денари, додека сметката за струја во најстудените месеци од годината достигнува до 5.000 денари.

Сепак, експертите предупредуваат дека не смее да се дозволи овој тренд на исклучување од мрежата на „Топлификација“ да продолжи, бидејќи тоа ќе биде погубно за стабилноста на енергетскиот систем на земјата. Но, секако, коментираат тие, тоа не значи дека треба да се задоволат сите барања на монополот.

„Топлификација“ веќе јавно објави, преку соопштение на Македонска берза, дека нема услови, ниту финансиски можности да продолжи со редовна дистрибуција на топлина до над 50.000 домаќинства во главниот град. Компанијата била задолжена кај повеќе деловни банки во земјава со кредити во висина од 10 милиони евра, кои не може да ги враќа ако на парното греење не му се покачи цената. За целиот случај „Топлификација“ ја обвинува Регулаторната комусија за енергетика која, според компанијата, подолго време нема слух за нивните финансиски проблеми. Виновни за финансискиот крах на „Топлификација“ можат да бидат и банките, ако годинава побараат да почне да се отплаќа и главнината на заемите, а не само каматите.

„’Топлификација’ во периодот од 2006 до 2010 година ги сервисираше трошоците за овие кредити и банките во тој период имаа разбирање да не се врати главнината на кредитот, ако се плаќаат каматите. Со оглед на поминатиот период од неколку години по земањето на овие кредити, за очекување беше дека банките ќе побараат да се врати и главнината на кредитите. Во периодот 2006-2011 година РКЕ при определувањето на цените на топлинската енергија со ниедна одлука не предвиде посебен износ за враќање на овие кредити, иако речиси во сите извештаи на ’Топлификација’ до РКЕ беше барано ова“, се вели во соопштението на компанијата.