Стоиљковиќ му сврте грб на Иванов поради Николиќ

Демократска партија на Србите во Македонија, коалициски партнер на владејачката ВМРО-ДПМНЕ, објави дека ги суспендира односите со претседателот Ѓорге Иванов бидејќи тој одлучи да не присуствува на инаугурацијата на новиот претседател на Србија, Томислав Николиќ, која се одржа вчера во Белград.

Овој потег на Иванов, кој според ДПС е непринципиелен и крајно штетен за односите меѓу двете држави и двата народа, практично претставува своевиден домино-ефект, по претходното одбивање на претседателите на Хрватска, на БИХ и на Словенија да отпатуваат во Белград на поздравување со Николиќ.

„Одлуката на Иванов не е во функција на унапредување на односите меѓу двете држави и двата народа и на јакнење на постигнатиот степен на меѓусебна соработка и доверба, и е лицемерна кон припадниците на македонската заедница во Србија која на изборите му ги даде своите гласови токму на новиот српски претседател и која во соработка со неговата партија прв пат стана парламентарна“, велат од ДПС.

Претседателот Иванов в петок треба да замине за Белград, каде што ќе учествува на конференција на Процесот за соработка во Југоисточна Европа.

За партијата на Стоиљковиќ е неразбирливо зошто со својата одлука да не присуствува на инаугурацијата на Николиќ претседателот Иванов ја приклучил Македонија кон, како што велат, „една група држави, која се' повеќе наликува на непринципиелна регионална коалиција, која не го почитува легитимниот и легалниот избор на српскиот народ и не ги уважува неговите интереси, со што на директен начин ја загрозува регионалната стабилност и соработка“.

За разлика од Иванов, кој не ги кажа причините зошто решил да му сврти грб на својот нов колега, преостанатите претседатели од регионот јавно кажаа дека треба да помине време за да се уверат дека Николиќ не го сменил само речникот, туку и дека ги напуштил големосрпските идеи. (Н.К.)