Колку можат да бидат искрени еден кон друг Црвенковски и Георгиевски

Здружувањето меѓу некогашните лути политички ривали предизвика експлозија од реакции на политичката сцена

Наум Котевски


Подавањето рака меѓу некогаш најголемите политички противници Бранко Црвенковски и Љупчо Георгиевски во „Александар Палас“ предизвика експлозија од реакции на политичката сцена, за моралната нишка на непринципиелните коалиции, но и за тоа колку ваквиот потег на двајцата архетипски политички противници може да им донесе успех на претстојните локални избори.

Мислењата кај аналитичарите се спротивставени, и покрај фактот што во овдешната политичка арена одамна не се градат политички тимови според идеолошката блискост. Практично, само имињата и историското наследство се останати како репер за определување на некоја партија како лева или десна.

По тој модалитет, да речеме, и Љубисав Иванов Ѕинго е во коалиција со Груевски. А, да речеме и Васил Тупурковски своевремено беше во коалиција токму со Георгиевски. Во таа влада министер за надворешни работи беше Слободан Чашуле. Тој, иако најавите за сојузништво меѓу Црвенковски и Георгиевски изгледаат цврсто, сега вели дека не верува дека на крајот ќе дојде до тоа.

„Секое здружување во политиката е на некој начин легитимно. А, тест за тоа дали ќе има позитивен ефект пред граѓаните, или не, се изборите. Но јас не верувам дека ќе дојде до посериозна соработка. Разликите кај нив за одредени прашања се непремостливи. Овој потег нема да им помогне ниту на едниот ниту на другиот“, вели Чашуле, кој лично смета дека нема да се случи ниту кулминација во смисла на негативниот пристап во политичките кампањи.

„Пресметка��а одамна е бескрупулозна, така да не гледам дека нешто ќе се промени на полошо“, смета Чашуле.

Бившиот премиер за евроинтеграции во владата во Груевски Ивица Боцевски кој на почетокот на неговата политичка кариера соработуваше со Црвенковски, вели дека овие двајца политичари обележааа една цела декада, во која се издвоија две политички движења. Боцевски, сега тврди дека денешната соработка меѓу Црвенковски и Георгиевски претставува многу повеќе симболика, отколку суштина.

„Кај народот постои една поговорка. Во иста река два пати не се влегува. Од нивна визија тие сакаат да направат некакво стратешко помирување. Во политиката е познат моментот ’Никсон оди кај Мао’. Тоа го направи човекот кој беше радикално против црвената Кина. Тоа може во нашиот контескт да се случи ако општеството ни е на рамниште од 90-те години. Но, јас лично мислам дека се случува преобразба. Сменети се политичките услови, но се менуваат и генерациите“, посочува Боцевски.

Политикологот Никола Спасов од агенцијата за истражување на јавното мислење „Рејтинг“, смета дека соединувањето е добар потег, но дека е неизвесно каков ефект ќе предизвика кај гласачите.

„Ќе видиме како ќе реагираат гласачите. Но потегот е исправен ако е целта да се соединат гласовите на опозицијата, наместо како на последните избори да се настапува разединето“, смета Спасов.

Комуникологот Сеад Џидас, пак, вчера на својот фејсбук профил го иронизираше новиот политички моментум. „Вести од 2025 година - Груевски и Црвенковски договорија изборна коалиција против премиерот Никола Тодоров и владата составена од негови клонови“, цинично коментира Џидас.

Во насока на ваквите допадливи имагинации, како доказ дека во политиката се' е можно, одредени аналитичари сметаат дека непринципиелните коалиции никако не значат дека учесниците треба веднаш да се гледаат во пламенот на политичкото сено.

Аналитичарот Алберт Муслиу неодамна потсети на искуствата во албанскиот политички блок. „ПДП и ДПА беа лути противници, а во 2002 година влегоа во коалиција. Од она што досега сме го виделе, можно е дури и ДУИ да седне заедно со ДПА, колку тоа во овој момент да изгледа невозможно. Македонија е млада демократија, така што класичната европска поделба на идеологии не е толку изразена. Најдобар пример е што левоориентираната ДУИ и десната ВМРО-ДПМНЕ се заедно во Владата. Гласачите кај нас гласаат за личност, за лидерот на партијата, а не за идеолошката определба или, пак, за програмата на таа партија“, рече Муслиу.