Државата се мисли колку вакцини да нарача

Вакцинацијата на лекарите се одвива тешко, па Комисијата се' уште не одлучила колкава да биде набавката од Холандија

Државата е во дилема колку вакцини да набави од Холандија. Комисијата за пандемски грип се' уште се мисли колку дози да нарача од вакцината против пандемскиот грип поради тоа што вакцинацијата кај здравствените работници се одвива тешко. Комисијата стравува да не се повтори истото тоа и со вакцинацијата на ризичните групи, па да не се потрошат вакцините.

„Комисијата се' уште нема дефинирано колку вакцини ќе ни требаат. Количините ќе зависат и од тоа како ќе се одвива вакцинацијата на лекарите“, ни изјави министерот за здравство, Бујар Османи. Според него, не треба да се стравува дека ќе останеме без вакцини зашто Македонија е прва на листата на земји што ќе имаат право да купат од вакцините на Холандија, зашто со оваа земја преговараме уште од септември. Холандската влада одлучила да продаде 8 милиони дози од вкупно 34 милиони дози колку што купила. „Цената на вакцината е околу 9,11 евра. Така ме известија од амбасадата“, ни рече министерот Османи, кој не откри која вакцина ќе ја нарачаме, на „Глаксо“ или на „Новартис“. Тој не знаеше ни дали цената е со ДДВ или без него и дали во таа цена е вклучен транспортот.

Во меѓувреме, грипот и натаму зема замав. Училиштата и градинките се полупразни, така што се добива впечаток дека новиот грип се' повеќе ги напаѓа децата од предучилишна и училишна возраст. Но, од училиштата и од градинките велат дека сите не отсуствуваат зашто се болни, туку многу родители не ги пуштаат децата и поради тоа што се плашат да не се разболат.

Во текот на вчерашниот ден, во Скопје се регистрирани триесетина нови сомнителни случаи на новиот грип. Од нив 18 се примени на Инфективната клиника, со што вкупната бројка на болничко згрижени пациенти се искачи на 89. Од новопримените болни, една пациентка е во потешка здравствена состојба и е поставена на апарат за дишење. На респиратор е уште и 25-годишното момче. Сите други заболени се во стабилна здравствена состојба. На Инфективното одделение во Воената болница се примени шест нови случаи, со што во ова болница вкупно од новиот грип се лекуваат 35 пациенти. На Детската клиника се лекуваат 70 деца, на возраст од шест месеци до пет години од кои три се нови случаи. Три деца се со потешка форма на бронхопневмонија, но дишат самостојно, додека другите, по препишната терапија, се во подобра здравствена состојба. (Ј.Ј.)