Заврши пријателството со солунскиот градоначалник

Крушевчанецот по раѓање Јанис Бутарис кој во Македонија е доживуван како умерен грчки политичар, ја напушти досегашната реторика

Од нашиот дописник
Миркица Поповиќ


Атина - Солунскиот градоначалник Јанис Бутарис остро го критикуваше македонскиот премиер Никола Груевски обвинувајќи го дека неговата политика и тактиката на непопустливост не помагала за решавање на проблемот за името. Бутарис кој е прв солунски градоначалник кој подаде пријателска рака кон Скопје на расправа на советот во Солун истакнал дека се изгубени многу шанси за решение во минатото.

Солунскиот градоначалник посочил дека спорот за името ќе се решел доколку на власт се' уште биле покојниот претседател Киро Глигоров или поранешниот премиер Љупчо Георгиевски, повикувајќи се на познанството и искуство со нив. Бутарис го обвинил Груевски за фалсификување на историјата, а посочил и дека однесувањето на македонската влада е под директно влијание на американската политика и дека ставот на сегашната македонската влада е „резултат на кривогледата тактика на САД“. 

Според Бутарис, и понатаму се губат шанси за решавање на спорот за името со тоа што не напредува дијалогот за предлози кои се веќе ставени на преговарачката маса за сложено име со географска одредница како Славомакедонија или Нова Македонија. 

Бутарис, кој е родум од Крушево, неколку пати ја има посетено Македонија како бизнисмен и претставник на неговата винарница, а во следниот период се очекува да ја посети Македонија и во рамки на неговата официјална функција. Кон крајот на мај Бутарис оствари средба со неговиот битолски колега, градоначалникот Владимир Талевски. Двајцата градоначалници на средбата во Солун потпишаа Декларација за партнерски настап на двата града за проект за културни индустрии во програмата за прекугранична соработка Интерег. На тогашната средба Бутарис потенцираше дека ќе се развива заедничка стратегија со Битола, затоа што покрај политичките разлики меѓу двата народи постојат многу сличности и врски кои треба да се подобруваат.

По неговото доаѓање на функција Бутарис во интервју за „Утрински“ истакна дека планира да направи коренита промена во менталниот склоп на Солун и да го направи градот попријателски кон туристи и од Македонија, Турција, Балканот со цел да ги побие фобиите и лошото мислење кое постои во северна Грција за грчките соседи. Во интервјуто и многупати понатаму Бутарис спомена дека предлогот Славомакедонија според него е добра идеја за компромисно решение кое ќе ги задоволи барањата и на двете страни на преговарачката маса. Во интервјуто за „Утрински“ истакна дека смета оти политиката на Груевски со споменици е погрешен чекор за модерниот изглед на градот, оценувајќи дека ваквата политика само ќе ги влоши работите меѓу двете држави. Потенцирајќи дека споменикот Воин на коњ може да биде извор на нови македонско-грчки расправии, во тогашното интервју Бутарис предлагаше да се спуштат тоновите во спорот со името да се намалат фанатичните инциденти од една и друга страна.

Бутарис, иако држи цврст тон за политиката на македонскиот премиер, во Солун е честа цел на десничарите кои имаат порадикални ставови за спорот за името од него. Во еден момент имаше судир со пратеници на Нова демократија. Бутарис е и првиот солунски градоначалник кој беше во судир со солунскиот митрополит Антимос, кој има радикални позиции за спорот за името и воедно прв градски татко кој не се удира во гради со тврдењето дека Македонија е една и грчка. Пред една недела Бутарис истакна дека не се согласува со воскреснувањето на Министерството за Македонија и Тракија, коментирајќи дека не помага повторното оживување доколку ова министерство нема конкретна функција, што наиде на остри реакции од пратеникот на Нова демократија, Костас Јулекас.