Во пензија како и досега

Државата не планира да ја зголеми старосната граница за пензионирање, изјави премиерот Никола Груевски. „Со сите пакети на антикризни мерки што ги презедовме и со останатите мерки и реформи кои континуирано ги преземаме сметаме дека можеме да ја одржиме сегашната ситуација без зголемување на старосната граница за пензионирање“, истакна премиерот Груевски.

Тој појасни дека речиси половина од земјите во Европа во изминатите три години, притиснати од светската економска криза и од европската должничка криза, како и од намалувањето на приходите во буџетот и редица други проблеми поврзани со пензиските фондови, беа принудени да ја зголемат старосната граница за пензионирање на 67, па дури и до 68 години старост. Но, Македонија, според Груевски, по неколкуте последователни кризи по 2008 година, излезе со помали лузни од европските земји.

„Имавме исклучително здрави макроекономски политики и исклучително стабилна макроекономска ситуација, денарот е стабилен. Макроекономски земјата исплива со максимално добра ситуација во едни вакви односи или со најмалку можни лузни во еден исклучително тежок период за цела Европа, па и за светот“, рече Груевски.

Во земјите од Европската унија општ тренд беше да се зголемува старосната граница за пензионирање. Така во Германија уште во 2006 година е усвоена реформа која предвидува постепено продолжување на старосната граница за одење во пензија од 65 на 67 години, и тоа во периодот од 2012 до 2018 година. Во Велика Британија и во Австрија границата за жените е 60, а на мажите 65 години, со што до 2020 година за добивање државна пензија постепено ќе се зголемува возраста од 65 години на 66 години, која ќе биде иста и за мажите и за жените. Холандија планира до 2025 година да ја зголеми границата за две години, односно на 65 години старост. Шпанската влада на почетокот на 2010 година ја објави намерата да ја зголеми старосната граница од 65 на 67 години.

Пензиските реформи ја потресоа Франција, со што возраст од 65 се зголеми на 67 години, додека за минималната пензија од 60 на 62 години. Најмалку промени има кај земјите-членки на ЕУ кои не се развиени или се соочуваат со економски проблеми, како што е Грција, каде што сега мажите се пензионираат на 65 години, а жените на 60 години, и така и ќе остане до 2020 година. (Ј.Ј.)