09.03.2012, 13:49 Владина делегација во лов на инвеститори во Малезија
Премиерот Груевски на бизнис форум во Куала Лумпур истакна дека Македонија и Малезија имаат многу сличности, како што се мултиетничноста, мирољубивоста и трудољубивоста, отвореноста за надворешна трговија и странски инвестиции.
Вистинско задоволство е одблиску да се види забрзаниот чекор на една новоиндустријализирана пазарна економија, како Малезија, која постигнува просечна стапка на економски раст од 6,5 проценти во изминатите педесет години, рече премиерот Никола Груевски на бизнис форум во Куала Лумпур, организиран од Малезиската индустриска стопанска комора.
- Од некогашен извозник на природни ресурси и суровини, Вашата земја денес изгради силно разгранета економија, која произведува високотехнолошки производи. Дозволете ми да му честитам на малезискиот народ за извонредните економски постигнувања, за кои допрва ќе се учи, порача премиерот Груевски во обраќањето на форумот.
Македонија и Малезија, додаде, имаат многу сличности, како што се мултиетничноста и мултикултурноста, мирољубивоста �� трудољубивоста, отвореноста за надворешна трговија и странски инвестиции.
- Преку ваквите бизнис форуми целта е да се пренесе приказната за малата, но растечка европска економија, која неодамна се искачи на третото место на најдобрите реформски ориентирани земји во светот, според Извештајот “Doing Business” на Светската банка, дополни Груевски.
Премиерот наведе дека овие резултати се плод на долгогодишна работа на Владата и ги потенцираше суштинските реформи за подобрување на деловната клима и градење имиџ на мошне привлечна европска инвестициска дестинација. Се осврна на рамниот данок од 10 отсто и за персоналниот доход и за добивката, ослободувањето од оданочување на задржаната добивка, постепеното намалување на социјалните придонеси за една третина, инвестирањето во човечкиот капитал преку инвестиции за образование на ниво од 6 отсто од БДП, и отворената економија, која преку потпишаните договори за слободна трговија со Европската унија и земјите од ЕФТА и Југоисточна Европа (ЦЕФТА), како и со Турција и Украина, сега е дел од големиот европски пазар.
На форумот се обрати Вонг Лаи Сум, извршен директор на Малезиската корпорација за надворешно-трговски развој, малезиска владина агенција која што работи во областа на надворешно-економската соработка. Таа се осврна на отворањето нови можности за продлабочување на економските релации помеѓу Малезија и Македонија.
Вицепремеиерот Зоран Ставрески пак, се осврна на макроекономската стабилност и за нејзината потврденост од страна на меѓународните кредитни рејтинг агенции во време на силни турбулентни движења во европската економија. Ставрески зборуваше и за скратените процедури за издавање дозволи, и младата и едуцирана работна сила.
Министерот Бил Павлески имаше презентација на трговските можности кои Македонија ги нуди за странските компании, при што се осврна на локациските, транспортните и логистичките предности кои што македонската економија им ги нуди на потенцијалните инвеститори.
Директорот на ТИРЗ, Виктор Мизо се осврна на поволностите кои што им се нудат на инвеститорите во развојните зони, а зборуваше и за конкурентските предности на Македонија споредено со останатите земји од регионот на Југоисточна и Источна Европа.
Премиерот Груевски и членовите на владината делегација остварија повеќе тет-а-тет средби со претставници на малезиски компании.
Владината делегација предводена од премиерот Груевски со денешниот настан, на кој имаше претставници на повеќе компании од секторите за преработка на храна, автомобилска индустрија, хотелиерство, финансиски сектор, ИТ сектор и други, ги заврши презентациите на македонските инвестициски можности во рамки на посетата на Индија и Малезија.
|
