Нимиц смислувал преодно име



Од нашиот дописник
Миркица Поповиќ

Атина - Грчките медиуми шпекулираат дека медијаторот Метју Нимиц повторно се активирал околу смислување предлог за името. Весникот „То вима“ пишува дека Нимиц по посетата на регионот работи на нов предлог за преодно, алтернтивно име за Македонија да може да добие покана за членство во НАТО на самитот во мај. Според информациите на весникот медијаторот е фокусиран да најде алтернатива на предлогот „Горна Македонија“, а потоа има план да ги повика преговарачите од двете страни да ја разгледаат идејата и да видат што може да се направи пред самитот на Алијансата.

Како што пишува „Вима“ Нимиц ја пренел оваа идеја за време на неговата посета во Атина на средбата со министерот за надворешни работи, Ставрос Димас.

Грчкиот шеф на дипломатијата, наводно, бил многу претпазлив околу оваа идеја, забележувајќи дека решавањето на спорот за името не може да се одвива во етапи. „Клучното прашање е кога точно ќе може да се даде таков предлог, ако се има предвид дека ситуацијата се комплицира поради политичкиот календар и случувања во Грција. Секако, постои и прашањето каква позиција ќе има претседателот на Нова демократија, Адонис Самарас, кој се очекува да биде победник на изборите“, пишува весникот.

Според анализата, одлуката од Хаг има влијание на ставовите на членките на НАТО и дел од нив размислуваат да го покренат прашањето за членството на Македонија на агендата на самитот во мај. „И покрај постојаните јавни коментари на генералниот секретар на НАТО, Андерс Фог Расмусен, дека решавањето на името е предуслов за прием на ФИРОМ, во дипломатски кругови постои чувство дека како што се приближува самитот во Чигако можно е да се видат потези од членки на Алијансата кои се спротивни на конзенсусот од Букурешт во 2008“, се забележува во анализата на „То вима“ .