21.08.2012, 15:59 Простотлук и необразованост во речникот за „Скопје 2014“
По три недели одмор, народните избраници се вратија во собраниските клупи
Ниту првиот работен ден на парламентарците, по тринеделниот одмор, не можеше да мине во релаксирана атмосфера. Финишот на маратонската расправа за „Скопје 2014’ се вжешти кога Силвана Бонева ги нарече необразовани кадрите на СДСМ, со кои од пред еден месец има нерасчистени сметки, бидејќи и' се смееја што го користи зборот „чужди“ (туѓи).
„Вие зборувате за идентитет, за јазик, а се смеете на јазикот со кој зборувале нашите предци, на кој пишувале Мисирков, Жинзифов, Миладинови... Тоа зборува колку сте необразовани“, реплицираше Бонева на говорот на професорката Ана Павловска Данева. Освен тоа, ја праша Данева зошто се срами од тоа што нејзиниот дедо се борел рамо до рамо со Тодор Александров.
„Вашиот простотилук доаѓа до израз секогаш кога немате факти. Студент на ваши години да зборува за необразованост“, реагираше пратеничката на СДСМ и поентираше дека од говорница се зборува на литератутен јазик, а тој на Бонева, според неа, е ужасно лош.
Дотогаш, расправата беше речиси млака и неинтересна. Од СДСМ алармира дека за мегаломанскиот проект досега се потрошени 500 милиони евра, што во услови на голема сиромаштија и невработеност, како и постојаното зголемување на цените на струјата, бензинот и на парното, е во најмала рака невкусно. Од ВМРО-ДПМНЕ стигнуваше стандарден одговор. Во недостиг од аргументи да се одбрани плафонскиот скок на бензинот и нелогичните случувања со парното, од владејачката партија ги нападнаа политичките конкуренти за продажбата на ЕСМ, што, според нив, било причина за сето лошо што и' се случува на струјата. (Г.А.)
|
