Комуналните редари добија униформи

Граѓаните ќе можат да ги препознаваат луѓето што казнуваат за фрлено догорче, смет на недозволено место, за истурање шут

Граѓаните од денеска ќе можат да ги препознаваат комуналните редари што казнуваат за фрлено догорче, смет на недозволено место, за истурање градежен шут... Тие ќе бидат облечени во темносини панталони, светлосина кошула и сино капче. На левиот ракав од кошулата, односно на јакната која е дел од зимската униформа, има натпис „комунален редар“ испишан на македонски и на албански јазик. Таква униформа ќе имаат редарите во сите скопски општини, со исклучок на Сарај, каде што допрва ќе бидат вработени редари, а на подрачјето на Карпош тие ќе бидат облечени по избор на градоначалникот Стевчо Јакимовски, кој, наводно, не ги сакал униформите што ги избрал Градот.

„Униформите ќе придонесат за препознатливост на комуналните редари и превентивно ќе дејствуваат на хигиената во градот. Нашата цел не е да ги зголемиме казните, ниту да казниме повеќе луѓе, туку да дадеме до знаење дека има лице што казнува доколку некој не се придржува на комуналниот ред“, истакна на вчерашната промоција на униформите, градоначалникот Коце Трајановски.

Тој информира дека во моментов Градот има ангажирано 19 комунални редари, од кои пет работат на подрачјето на Ѓорче Петров, Центар има четири редари, Шуто Оризари, Аеродром, Кисела Вода и Гази Баба по три, а општините Бутел и Чаир по двајца комунални редари.

На вчерашната промоција присуствуваше и министерката за внатрешни работи Гордана Јанкулоска, според која во изминативе 4 години откако е во сила Законот за јавна хигиена, значително била подобрена еколошката слика. Сепак, се' уште има несовесни граѓани. Според статистиките, на подрачјето на Скопје биле поднесени 1.100 прекршочни пријави, а на ниво на цела држава 64.404. „Најголем дел од казните се изречени за фрлање отпад на недозволени места“, рече Јанкулоска.