Кој е Џејмс Бериша, „летачкиот Албанец“?

На мисијата „Летајќи за Косово“ низ светот, пилотот од Ел Пасо лобира за признавање на својата земја

Иако за македонската јавност ова име е целосна непознатост, кај Албанците во Косово, во Македонија во дијаспората и во Албанија, Џејмс Бериша е прилично славна личност со ореол на неуморен борец за човекови права и пилот кој со лет околу светот лобира за меѓународно признавање на независно Косово. Тој се сретна вчера во Тетово со лидерот на ДУИ, Али Ахмети.

Моментно Бериша е топ-тема на албанските медиуми по веста за неговото ослободување од шестемесечен притвор во Еритреја во кој западнал под многу чудни околности лани на 15 август на една од неговите летови со „авион околу светот“ во мисија во која лобира за признавање на Косово. Лично потпретседателот на косовската влада и познатиот мултимилијардер Беџет Пацоли лобирал кај еритрејските власти за негово ослободување и пред една недела одново лично тој ја известил јавноста дека Џејмс е слободен. Од Еритреја, Пацоли и Бериша преку Истанбул заедно се вратиле во Косово.

Во официјална информација од кабинетот на вицепремиерот беше соопштено дека Пацоли го исполнил ветувањето дадено на неговата мајка дека нема да запре се' додека нејзиниот син не биде ослободен и додека не триумфира правдата.

На социјалните мрежи ослободувањето на човекот чија животна максима е „Летајќи за Косово“ е дочекано со одушевување. Од 15 август минатата година контактите со летачкиот Албанец биле прекинати откако принудно слетал на некоја непозната локација во Судан и откаде, најверојатно, бил уапсен и фрлен во затвор.

Четириесетгодишниот Џејмс Бериша, кој е постојан жител на Ел Пасо, Тексас, САД, во 2009 година (една година по признавањето на Косово) решил да ја почне својата мисија „летајќи за Косово“ и во агендата на својот лет околу светот утврдил триесетина држави. Пилотска дозвола стекнал во Флорида (Flight Safety Academy in Vero Beach) и веќе имал еден лет со авион со еден мотор од Алјаска до Скопје во 2008 година.

Себеси се претставува како албанско-американски пилот, американски државјанин со потекло од Косово.

Роден е во 1972 година во Косово, каде што, како што стои во биографијата на неговиот официјален сајт (Flying for kosovo), останал до својата шеснаесетта година, односно до моментот кога сфатил дека неговиот сон да стане пилот не може да се реализира „во комунистичка Југославија“ поради неговата „расна припадност“. Заминува, значи, во Швајцарија каде што почнува да работи две работи, како градежен работник и во многу престижен хотел. Учи и добива диплома која му овозможува да напредува во менаџментот во хотелот и некаде во исто време ја добива и својата швајцарска приватна пилотска дозвола.

На 20-годишна возраст Бериша е веќе во Австралија (нема објаснување како и зошто) каде што посетува англиски колеџ за да го научи англискиот јазик, „вештина која е неопходна на секој што сака да стане пилот“.

Три години подоцна, на 23-годишна возраст, Џејмс Бериша, конечно, ја добил пилотската диплома на Флорида. (Н.Р.)