Демонстрации во Техеран поради падот на вредноста на риалот

Иранската полиција се судри со демонстрантите во Техеран кои го изразуваа својот протест поради големиот пад на вредноста на националната валута - риалот.

Полицијата против насобраниот народ употреби солзавец, а повеќе демонстранти се уапсени.

Над сто луѓе се собраа пред Централната банка на Иран и бараа оставка од гувернерот, а исто така извикуваа и антивладини пароли.

На демонстрантите им се придружиле и дел од сопствениците на продавниците во централниот Голем пазар во Техеран.

Претставникот на здружението на сопствениците на продавници во Големиот паза��, Ахмад Карими-Есфахани изјави дека неговите продавници се затворени поради „безбедносни причини“ и оти очекува повторно да ги отвори утре.

Полицијата тврди дека мал број луѓе протестираат во Големиот пазар.

Риалот во последните денови падна на најниско ниво во однос на американскиот долар.

Експертите за падот на вредноста на риалот посочуваат неколку фактори. Но, како главен фактор го истакнуваат влијанието на финансиските санкции за Иран од страна на западните земји. Иранските девизни резеви воглавно се од извозот на нафта. Но, бидејќи поради санкциите има помалку долари, вредноста на американската валута порасна во однос на риалот.

Како втор фактор се наведува дека Иранците своите заштеди ги претвораат во долари. Додека како трет фактор се наведува владината политика што подолг период вредноста на риалот ја држеше прилично висока.

Иранскиот претседател Махмуд Аџмадинеџад за падот на вредноста на риалот ги обвини западните земји, нагласувајќи дека тие водат економска војна против Иран.