03.10.2012, 14:41 Јанкулоска: МВР нема нови сознанија за атентатот врз Глигоров
„Предметот се уште е отворен и секоја нова информација или сознание што може да води кон откривање на сторителите со максимално внимание ќе биде анализиран“, информира министерката
МВР не може да излезе со нови или различни податоци од она што веќе е кажано во претходните години во врска со атентатот на поранешниот претседател Киро Глигоров. Предметот се уште е отворен и секоја нова информација или сознание што може да води кон откривање на сторителите со максимално внимание ќе биде анализирано со цел да се дојде до извршителите на атентатот, информира денеска министерката за внатрешни работи Гордана Јанкулоска.
- Во повеќе наврати потсетуваме дека колку што одминува времето потешко е да се дојде до вистинските податоци. Навистина е штета што во моментот кога се случил атентатот не се одговорило на нивото на задачата, односно не биле максимално професионално преземени сите полициски активности кои неопходно е да бидат преземени, рече Јанкулоска, додавајќи дека таквите неопходни активности за стручно вршење на увид се основа за потоа соодветните служби да ги анализираат податоците и евентуално да излезат со одговор за тоа што точно се случило и кои се извршителите.
Таа уште еднаш потенцира дека со секој поминат ден шансите за доаѓање до вистината, како што рече, се намалуваат, но МВР не се откажува.
Во изминатиот период, посочи таа, имаше спектакуларни најави од страна на лица кои во тоа време требало и можело да направат нешто, меѓутоа, истакна, од сите тие работи освен желбата за себепромоција или за поголемо влијание во јавноста на поединците излегоа со такви информации не излезе ништо конкретно.
|
