На Иванов не му треба советник за безбедносни прашања

„Утрински весник“ во повеќе наврати го постави тоа прашање, но ниту еднаш не доби конкретен одговор од Кабинетот на претседателот

Татјана Поповска

Претседателот на државата Ѓорге Иванов веројатно е меѓу ретките, ако не и единствен шеф на држава кој целиот мандат ќе го помине без советник за национална безбедност, кој всушност треба да биде клучна фигура во кабинетот на еден највисок државен функционер.

„Утрински весник“ во повеќе наврати во текот на мандатот на Иванов, кој завршува за шест месеци, го отвори ова прашање, но ниту еднаш не доби конкретен одговор од неговиот Кабинет зошто нема советник за национална безбедност. Одговор на ова прашање, но и за тоа како претседателот Иванов функционира без советник за национална безбедност и со кого се консултира за овие теми, не добивме ниту вчера, иако прашањата беа доставени пред два дена. Особено што Иванов, како претседател на државата е и претседател на државниот Совет за безбедност кој го сочинува целиот државен врв – претседателите на Собранието и на Владата, министрите за одбрана, за внатрешни и за надворешни работи, како и надворешни експерти.

Без советник за национална безбедност во моментов е и премиерот Никола Груевски. Но, тој за разлика од Иванов во својот седумгодишен мандат имаше советник за национална безбедност – актуелниот амбасадор во Холандија Никола Димитров , кој за ова прашање беше советник на поранешниот претседател Борис Трајковски и на поранешниот премиер Владо Бучковски. Груевски без советник остана откако Димитров беше именуван за амбасадор на Македонија во Холандија. Од Кабинетот на премиерот неодамна информираа дека веќе е распишан конкурс за прием на нови шест советници, меѓу кои и за национална безбедност. Очекуваат дека наскоро ќе заврши постапката за избор на новите советници, бидејќи првата фаза од постапката е завршена.

За поранешниот премиер Владо Бучковски е целосно неприфатливо двајцата клучни функционери во државата да работат без советник за национална безбедност. Тоа особено важи за претседателот на државата, бидејќи тој е и врховен командант на Армијата на Република Македонија.

„За мене е дикутабилна одлуката на шефот на државата цел мандат да го помине без советник за национална безбедност. Не може претседател на една држава да биде експерт за овие прашања. Всушност советниците за национална безбедност се клучни и многу важни членови во кабинетите на претседателите. Иванов сега е на крајот на мандатот и веќе и не е важно дали ќе назначи советник за овие прашања“, коментира Бучковски.

Тој смета дека Груевски очигледно сфатил дека е корисно да се има советник за национална безбедност и затоа распиша оглас за негово вработување. Поранешниот премиер потсетува дека кога тој станал прв човек на македонската влада само ја продолжил практиката на неговите претходници и за сите безбедносни прашања се советувал со експерти.

„Во мојот кабинет советник за безбедносни прашања беше амбасадорот Никола Димитров, кој дојде на ова место откако му заврши мандатот во амбасадата во Вашингтон. За национална безбедност се консултирав и со експертот за меѓународни прашања Александар Матовски“, потсетува Бучковски.

Според хиерархиската поставеност во претседателските кабинети, не само во земјава, советникот за безбедност е еден од тројцата најблиски соработници на шефот на државата, покрај генералниот секретар на кабинетот и советникот за надворешни работи. Негова обврска, меѓу другото, е да контактира со службите за безбедност и со резидентите на странските служби. Советникот за безбедност е и секретар на Советот за безбедност - советодавно тело на шефот на државата во кое членуваа�� претседателите на Владата и на парламентот и министрите за одбрана, за внатрешни работи и за надворешни работи, како и тројца надворешни членови.

Претседателот Иванов, според информациите од неговата официјална интернет-страница, има шест советници. Во неговиот советнички тим се Лубен Арнаудоски - заменик генерален секретар за правни и финансиски работи, Иле Масалковски - заменик генерален секретар за организациски и протоколарни работи, полковник Васко Ѓурчиновски - Аѓутант на Претседателот, Дарко Костадиновски - државен советник за надворешна политика, Ахмед Ќазими - државен советник за економски прашања и

Љуљета Ќуфлију - советник за меѓунационални односи.

Како е во регионот

Наспроти практиката на Иванов, неговите колеги од регионот не си дозволуваат да функционираат без советници за безбедност. Хрватскиот претседател Иво Јосиповиќ на пример има голем советнички тим, а за безбедносни прашања го советува Саша Перковиќ, кој му бил советник и на поранешниот претседател Стипе Месиќ. Српски претседател Томислав Николиќ, за советник за одбрана и безбедност го поставил пензионираниот полициски генерал Милорад Симиќ, а претседателот на Словенија Борут Пахор за безбедносни прашања го советува Урош Крек.