Дали лекар ќе работи како пекар

Владата тврди дека сака да вработува, опозицијата смета дека целта е вештачки да се намали невработеноста

Маја Томиќ


На македонскиот пазар со огромна понуда на работа сила и со минимална побарувачка за неа, со стапка на невработеност од 31,6 отсто и во состојба кога во просек се чека и по 8 години за работа, Владата реши да им нуди вработувања на невработените лица. Во процедура се измените во Законот за вработување и осигурување во случај на невработеност.

Што ќе донесат тие? Дали ред и една пореална слика со состојбата со невработените, или пак, вештачко намалување на бројот на невработените со симнување од списоците на Агенцијата за вработување на стотици лица? Дали ќе се случи на невработен доктор Агенцијата да му понуди вработување како пекар или продавач, и обратно, или пак ќе се нуди работа според завршеното образование на лицето?

Предлагачот, Министерството за труд и социјала, МТСП, образложи дека основната цел на законските измени не е административно бришење на невработените и дека евидентираните во Агенцијата за вработување нема да ја изгубат социјалната или паричната помош. Опозицијата пак, ја нападна Владата дека со измените единствено сака вештачки да ја намали бројката на невработени во државата. Таа во мај изнесува 266.832, и е за 48.640 лица помалку од истиот месец лани.

Министерот за труд и социјала Спиро Ристовски вчера изјави дека измените со подготвени по примерот на 25 европски земји и дека нема, како што обвинува опозицијата, да се случи дипломиран доктор да работи како пекар или обратно. Туку дека според квалификациите и образованието на невработениот ќе му биде понудена соодветна работа.

Според и��мените, на невработените ќе им се нуди работа која ако ја одбијат, ќе бидат избришани од листата во Агенцијата. Според предлагачот, така ќе се добие реална слика за лицата кои навистина бараат работа и оние кои се пријавуваат во Агенцијата само заради сини картони, нешто за што и досега постоеше евиденција во оваа институција.

„Лицата кои ќе одбијат погодна или соодветна работа во согласност со Законот, нема да бидат избришани од регистрацијата на Агенцијата, туку ќе се пререгистрираат во вториот тип на евиденција, односно евиденцијата на ’други лица кои бараат работа““, реагираа деновиве од Министерството за труд и социјала, додавајќи дека со предложените измени на Законот ќе има промени во водењето и типот на евиденциите во Агенцијата, каде што се врши разграничување на невработени лица кои само се регистрираат и оние другите кои активно бараат работа, односно водење на два посебни списока.

Инаку, според предложените измени, соодветно вработување може да му се понуди на невработениот во период од денот на неговото воведување во евиденцијата, до истекот на 12 месеци од тој ден. Агенцијата може да понуди погодно вработување од 12 месеци до 24 месеци од денот на воведување во евиденцијата, за работно место со еден степен пониско образование од она што го има. А, по истекот на 24 месеци може да му се понуди и друго работно место, без разлика на неговото образование.

Доколку невработениот еднаш одбие понудено вработување, ќе се опомене од Агенцијата. А, ако втор пат го стори тоа, по службена должност ќе се евидентира во листата на „други лица“ во Агенцијата.

Корисниците на социјална парична помош и членовите на нивните семејства ќе имаат обврска да прифатат ангажирање на јавна работа или работа од јавен интерес. Доколку одбијат, ќе се бришат од евиденцијата на невработени лица. На лицата со инвалидност ќе им се нуди работно место што е оддалечено најмногу два часа возење со јавен превоз, а за другите невработени до еден час. А, со согласност на невработеното лице, може веднаш да му се понуди работа која е на пониско ниво на образование од она што го има.