Санадер се богател и од Македонци

По повлекувањето од политиката, поранешниот хрватски премиер станал консултант

По повлекувањето од премиерската фотелја, Иво Санадер богато ги наплатувал своите советнички услуги. Во 2010 година, поранешниот претседател на ХДЗ, отвора консултантска фирма. Работи маркетиншки услуги, го истражува ИТ-секторот, ги советува банките, решава проблеми со недвижности, дава ПР-услуги за развој на културата, посредува во финансирање соларни проекти, ангажиран е на проекти за создавање кинески Холивуд, испорачува компјутери, договара средби меѓу челните луѓе на одредени држави, а заедно со италијанскиот магнат Силвио Берлускони се обидува да го продаде фудбалскиот клуб „Милан“. За една година наплатил половина милион евра, а меѓу фирмите што ги користат неговите услуги е и скопската „Паком компани“, која му исплатила 99.000 евра.

Ова се детали од најновата афера поврзана со Санадер, која вчера ја објави загрепски „Јутарњи лист“. Инспекторите, кои го чешлаат работењето на хрватскиот експремиер биле вџашени од сите негови активности.

„Неговиот вистински живот би бил навистина добра подлога за возбудлив криминалистички роман, само да знаевме каде исчезнаа нашите милиони и на Хрватска да не и' нанесеше толкава штета“, пишува „Јутарњи“ без заддршка за некогашната икона на хрватската политика, против која, сега, се водат неколку судски процеси.

Според пишувањето на весникот, Санадер по заминувањето од политиката, ги основа фирмите „Алиа советување“ и „Пербујац“, подигнувајќи банкарски кредит од околу 800.000 евра. Купува огромен бизнис-простор во загрепската населба Трешњевка. Работи се' и сешто. Лобира кај Силвио Берлускони, Борис Тадиќ, а најмногу кај црногорските функционери. Патува во Брисел, Виена, Рим, Цирих, Тирана, Белград, Подгорица и Америка. Најзанимливиот дел од истрагата е сознанието дека на Берлускони му помагал да го продаде гигантот „Милан“ на богати Евреи.

„Да. И тоа го работел. Со италијанскиот премиер се наоѓа во римската резиденција Палацо Грациоли. И во неа, како и во останатите вили што ги поседува, богатиот италијански бизнисмен, наводно, организирал разуздани забави. Но, тема на средбата со хрватскиот експремиер не се дамите на ноќта, туку продажбата на еден од најуспешните фудбалски клубови на светот“, пишува „Јутарњи“.

Наводно, продажбата на клубот се проценила на 300 милиони евра, од кои Санадер би добил десет проценти поради посредништвото. Тие пари требало да ги исплати богато еврејско семејство од Лос Анџелес, со кои Санадер создал добри односи додека бил премиер. Но, бизнисот пропаднал. Дали проблемот бил во незадоволството на Берлускони со високата провизија на Санадер, или, пак, купувачите се премислиле, истражителите не утврдиле. (Г.А.)