Милчин ќе го лустрираат втор пат

Бившите функционери повторно на тапет на лустраторите

Комисијата за лустрација одново ќе ги отвара предметите со поранешни функционери кои беа прогласени за соработници на службите,а кои Управниот суд ги поништи по одлуката на Уставниот суд. Меѓу десеттината случаи е и оној на извршниот директор на Фондацијата отворено општество Македонија, Владимир Милчин кој повеќе од една година се обидува да докаже дека е жртва на политичка хајка, заради своите критички ставови кон владејачката партија.

На вчерашната седница, која поминала во кавги не се расправало за конкретни личности, туку со гласање било одлучено тоа да се направи на една од наредните седници. Двајца членови блиски до опозицијата, побарале да не се расправа околу поранешни функционери, бидејќи сметале дека во таа насока е последната интервенција на Уставниот суд. Тие побарале и експертско толкување во овој дел на законот. Еден од членовите на комисијата, пак, изнервиран ја напуштил седницата.

Претседателот на Комисијата,Томе Аџиев негира дека имало расправии на седницата. Сепак, потврдува дека вчера било отворено ова прашање,а со конкретните случаи ќе се занимаваат идната недела.

Тој вели дека нема потреба од експертско толкување,бидејќи како што вели, законот е јасен.

„Ако на некои членови не им е јасен законот,тоа е нивен проблем. Или треба да си одат, или да се скријат во темнина, што не знаат“, иронизира Аџиев.

Членовите, пак, кои и формално побараа оваа точка да се стави на дневен ред, со цел да се изгради заеднички став и да нема разниогласие, велат дека не случајно Уставниот суд веќе се произнел дека процесот на лустрација треба да се однесува на актуелни функционери, а не на поранешни.

Првиот човек на ФООМ, Милчин ќе го лустрираат по втор пат како поранешен функционер. Според новиот закон за лустрација, лицата што ќе се лустрираат немаат обврска да поднесат изјави до комисијата. Приоритетот ќе го одредува Комисијата. Милчин веќе еднаш беше прогласен за кодош и поднесе жалба до Управниот суд. Сепак постапка не почна бидејќи откако Уставниот суд укина дел од одредбите на законот за лустрација, Управниот суд по автоматизам, без да се одржи судско рочиште, ја поништи одлуката на Комисијата. (Г.Д)