Делчево нема пари, ама градоначалникот купи автомобили

Наместо водоснабдување и проширување на градинката, градоначалникот Горан Малешевски купил две луксузни возила

Иван Бојаџиски



Штип – Делчево го тресе нов скандал. Наместо да инвестира за потребите во водоснабдувањето и за поголем опфат на децата во градинка, градоначалникот Горан Малешевски, со поддршка на Советот на Општината, купил две луксузни возила, едно за себе, другото за потребите на Општината, за што од буџетот се издвоени 37.500 евра. Од опозициската СДСМ сметаат дека се работи за неодговорен однос кон парите на граѓаните и на нивните темелни потреби од страна на градоначалникот и Советот на Општината, во кој односот на силите е 15:4 во корист на ВМРО-ДПМНЕ, од чиишто редови е и градоначалникот Малешевски.

„Овој неразбирлив чин на луксузирање Малешевски и Советот на Општината го направија во време и во услови на блокада на сметката на Општината за 50 милиони денари и тоа без пресметана камата. Поради таквата финансиска состојба општина Делчево не влезе во втората фаза на децентрализацијата, а на седница на Советот е донесена одлука за ребаланс на буџетот за 9,3 милиони денари бидејќи не се извршува проектираниот буџет “, вели Горан Трајковски, претседател на Општинската организација на СДСМ. Од опозициската партија го обвинуваат градоначалникот дека наместо за суштински потреби на градот и на граѓаните тој потрошил големи пари на возила, иако автомобилите што ги наследил пред две години кога дошол на функција биле сосема нови и употребливи.

„Дел од парите од буџетот требаше да се употребат за изградба на пречистителна станица на браната „Олшана“, но на предлог на градоначалникот и со амин на советниците од ВМРО-ДПМНЕ таа потреба е одложена по вторпат.

Покрај оваа, една од најголемите потреби на градот е проширување на детската градинка, бидејќи Делчево има потреба од сместување на уште најмалку 70 деца, но сегашниот капацитет на градинката не го дозволува тоа. Но, за Малешевски и за вмровските советници поприоритетни беа луксузните автомобили отколку децата и потребите во доменот на квалитетното водоснабдување“, потенцира Трајковски.

Градоначалникот Малешевски купил возила „пасат“ вредно 25.000 евра,е' но и „форд“ вреден 12.500 евра иако на располагање имал „форд фокус“ од крајот на 2006 година, а за потребите на Општината имало уште две возила „поло“ и „тико“, кои биле во сосема добра состојба. Овие возила, според опозицијата, биле повеќе од доволни за Општина со 17.713 жители од кои 10.454 живеат во градот. Во врска со овој случај се обидовме да ја слушнеме и другата страна. Десетина пати, на сите можни начини го баравме градоначалникот Малешевски, но тој не најде за потребно да одговори на обвинувањата.

Николчо Трајановски, претседател на Општинскиот совет и претседател на Унијата на млади сили на ВМРО-ДПМНЕ прво кратко ни рече дека барањето за набавка на автомобили дошло од градоначалникот за потоа да го прекине разговорот со ветување дека по е-пошта ќе ни го испрати својот став во однос на обвинувањата што доаѓаат од страна на опозицијата. Чекавме и подолго од закажаниот термин, но од првиот советник во овој град не добивме никаква информација.