Едиторијал

Шеикот не раздвижи, но да не не заслепи

Александра М. Митевска

Емирот од Катар, шеикот Хамад бин калифа ал - Тани, дојде во Скопје, прошета низ чаршијата, ја заскокотка љубопитноста на граѓаните и си замина со орден и униформа, со импресии од македонските вода и печено месо и со ветување дека неговата земја ќе инвестира во Македонија. Албанија е следната дестинација во неговата балканска рута на турнејата низ Европа.

Така, обично, завршуваат сите државнички билатерални средби - со договори за поинтензивна економска сорботка. Но, емирот од Доха не беше обичен гостин. Неговото доаѓање, особено во ситуација кога странски државници не навраќаат често во државата, беше атракција, па затоа и ги мобилизира политичарите и ги заинтригира бизнисмените. Низ скопските улици не може секој ден да се види шеик со цела свита. Затоа и се следеше до најмала пикантерија неговата посета и се прераскажуваа сите детали, почнувајќи од специфичната традиционална облека во неговата земја, семејната состојба ( имал три жени и 24 деца)..., па до несреќниот курцшлус во „Александар Палас“.

Катар е мала, но многу богата држава и со тоа завршува секој обид да се повлече некаква паралела со нашата земја. Држава е устроена како апсолутна монархија на чие чело веќе век и половина е династијата ал - Тани. Шеикот што беше во Скопје во исто време е и премиер и шеф на државата. Сепак, ал-Тани важи за реформски ориентиран политичар, кој работи на демократизација на Катар.

Македонија, пак, нема нафта и земјин гас, уште помалку БДП од над 88,6 илјади долари по жител, а, колку што е познато, немаме ни монарх. Сепак, Катар е една од ретките арапски држави со кои Македонија (во 2004 година) има воспоставено дипломатски односи, на ниво на амбасади. Од тие аспекти, посетата на ал - Тани е значајна за земјава.

Треба да се искористи пружената рака за соработка, откако двете држави го потпишаа договорот за испраќање работници од Македонија во Катар, а Владата соопшти дека гостите се заинтересирани за инвестирање во повеќе области, а особено во енергетскиот сектор, банкарството, земјоделството и инфраструктурата. Властите во Катар, очигледно, се расположени за инвестирање во регионот. Пример за тоа е доаѓањето на познатата катарска телевизија Ал Џезеира на просторите на поранешна Југославија.

Но, во ситуација кога македонските власти отворено настапуваат со сомневања за евроатланските перспективи на државата поради, како што велат, фаворизирањето на Грција и условувањето на Македонија да го реши прашањето за името, „злобниците“ би можеле да побараат и друга симболика во посетата на високиот гостин од арапскиот свет.

Впечаток е дека, во последно време, се интензивира „дружбата“ на Македонија со земјите од Југозападна Азија. Пред неколку дена престојуваше во Скопје една друга делегација од шеици, претставници на Народното собрание на Кувајт.. Нивната посета, сепак, не помина толку бомбастично во јавноста. Минатиот месец во Њујорк, пак, на маргините на Генералното собрание на ОН, шефот на македонската дипломатија, Никола Попоски, се сретна со колегата од Кувајт, со кого разговарале з интензивирање на соработката меѓу двете земји, особено во полето на економијата.

Македонија не може да биде зијан од дружбата со Катар или со Кувајт. Напротив, добро е комуникацијата да продолжи и да се продлабочи. Но, тоа не смее да биде на сметка на соработката со земјите кои ни се и поблиски и послични и со кои делиме послични вредности. И кон чиј табор се стремиме да се приклучиме. Или барем не' убедуваа дека е така до неодамна.